चाकण : चाकण शहर व परिसरात घरगुती गॅस सिलिंडरच्या भीषण टंचाईने गंभीर रूप धारण केले असून, संतप्त नागरिकांनी थेट रस्त्यावर उतरून पुणे-नाशिक महामार्ग रोखत प्रशासनाविरोधात तीव्र आक्रोश व्यक्त केला. अचानक उफाळलेल्या या आंदोलनामुळे महामार्गावर प्रचंड वाहतूक कोंडी निर्माण झाली आणि वाहनांच्या लांबच लांब रांगा लागल्या. गेल्या अनेक दिवसांपासून गॅस पुरवठा अत्यंत अपुरा होत असल्याने नागरिक त्रस्त झाले होते. अनेकांना तासनतास रांगेत उभे राहूनही सिलिंडर मिळत नसल्याने अखेर संतापाचा उद्रेक झाला. घरगुती स्वयंपाक ठप्प झाल्याने विशेषतः महिलांमध्ये तीव्र नाराजी पसरली आहे. घर चालवणे कठीण झाले आहे, गॅसशिवाय जगणे अवघड झाले, अशा संतप्त प्रतिक्रिया नागरिकांनी व्यक्त करत प्रशासनाच्या निष्क्रियतेवर जोरदार टीका केली. या पार्श्वभूमीवर नागरिकांनी एकत्र येत पुणे-नाशिक महामार्गावर ठिय्या आंदोलन सुरू केले. आंदोलनादरम्यान प्रशासनाविरोधात घोषणाबाजी करण्यात आली. आश्वासन नको, तात्काळ गॅस हवा, अशी ठाम भूमिका आंदोलकांनी घेतली. घटनेची माहिती मिळताच चाकण वाहतूक पोलीस आणि दक्षिण चाकण पोलीस घटनास्थळी दाखल झाले. पोलिसांनी नागरिकांशी संवाद साधून परिस्थिती नियंत्रणात आणण्याचा प्रयत्न केला. काही वेळानंतर वाहतूक सुरळीत करण्यासाठी हालचाली करण्यात आल्या, मात्र नागरिकांचा रोष कायम असल्याचे चित्र होते. दरम्यान, गॅस टंचाईमागे आंतरराष्ट्रीय स्तरावरील तणावाचे कारण पुढे केले जात असले, तरी स्थानिक पातळीवरील नियोजनाचा अभाव आणि प्रशासनाचे दुर्लक्ष यामुळेच ही परिस्थिती उद्भवल्याचा आरोप नागरिकांकडून करण्यात येत आहे. सध्या परिसरात तणावपूर्ण शांतता असून, प्रशासनाने तातडीने गॅस पुरवठा सुरळीत करावा, अन्यथा आंदोलन अधिक तीव्र करण्याचा इशारा नागरिकांनी दिला आहे. नागरिकांचा संताप टोकाला गॅस सिलिंडरचा तीव्र तुटवडा; अनेक दिवसांपासून पुरवठा विस्कळीत तासनतास रांगेत उभे राहूनही सिलिंडर मिळत नाही महिलांमध्ये प्रचंड नाराजी; घरगुती स्वयंपाकावर परिणाम संतप्त नागरिकांनी पुणे-नाशिक महामार्ग रोखला प्रशासनाविरोधात जोरदार घोषणाबाजी तात्काळ उपाय करा, अन्यथा आंदोलन तीव्र करू – नागरिकांचा इशारा प्रशासनावर गंभीर प्रश्नचिन्ह वेळेवर नियोजन का झाले नाही? पुरवठा साखळीबाबत स्पष्ट माहिती का देण्यात आली नाही? नागरिकांना पर्यायी व्यवस्था का उपलब्ध करून दिली नाही? वारंवार तक्रारी करूनही प्रशासनाने दुर्लक्ष का केले? हेही वाचा : Pune District : शिरूर तालुक्यात अवकाळी पावसाचा तडाखा
