पुणे – कौटुंबिक हिंसाचाराविरुद्ध कचरा महिला एकवटल्या असून, त्यासाठी वस्तीपातळीवर काम करण्याचा निर्धार त्यांनी केला आहे. तसेच या कायद्यासंदर्भात जागृती करण्याचाही निश्‍चय या महिलांनी केला आहे. “कागद काच पत्रा कष्टकरी पंचायत’ या कचरा वेचकांच्या कामगार संघटनेने आयोजित केलेल्या मेळाव्यात या महिलांनी एकजूट दाखवली.

आपले वैयक्तिक अनुभव, गटचर्चा, नाटक-नृत्य असे कार्यक्रम झाले. यावेळी जिल्हा महिला आणि बालविकास अधिकारी मोनिका रंधवे, सामाजिक कार्यकर्त्या दीपा पवार, पत्रकार हिना खान, पोलीस उपनिरीक्षक माधुरी पोकळे, कायदा सल्लागार ज्ञानेश्‍वर केंद्रे उपस्थित होते.

आमच्या सभासद महिलांवर, घरातील मुलाबाळांवर होणाऱ्या हिंसेवर संघटित होऊनच उपाय शोधू शकतो असे आम्हाला लक्षात आले. त्यातूनच आम्ही स्थानिक पातळीवर आधारगट सुरू केले. ज्याद्वारे हा प्रश्‍न वस्तीपातळीवर सोडवला जाईल. कायद्यासंबंधी मदत घेण्यासाठीही आम्ही वेगवेगळ्या सामाजिक संस्थांसोबत सज्ज आहोत.

आम्ही कचरा वेचक महिला एकजूट होऊन या अन्यायाविरोधात लढू असा निश्‍चय करतो, असे कचरा वेचक प्रतिनिधी राणी शिवशरण हिने सांगितले. भगिनींच्या बाबतीत कौटुंबिक हिंसाचारासारखे अत्याचार झाल्यास त्यांनी जिल्हा महिला बालविकास अधिकारी कार्यालयास संपर्क साधावा, असे आवाहन रंधवे यांनी केले.

महिलांनी आणि विशेष करून श्रमजीवी महिलांनी हिंसेची रणीनिती ओळखूनच चाल केली पाहिजे. आपणही समतेची, ऐक्‍याची, न्यायाची वाट दाखवणाऱ्या संविधानिक अभिव्यक्ती ने जमेल तसे तत्पर राहू. यात संघटित असणे महत्वाचे म्हणजे नेतृत्वात असणे आपल्याला बळ देईल, असे पवार म्हणाल्या. यावेळी महिलांची मोठी उपस्थिती होती.

हिंसेचा विरोध करण्यासाठी केवळ मुलींना सक्षम बनवून चालणार नाही, तर मुलांशीही बोलते राहावे लागणार आहे. तिच्याबद्दलच्या अडचणी त्यालाही समजावून सांगाव्या लागतील. तरच, तिच्या हक्कांची जाणीव पुरुषालाही करून द्यायला हवी. याद्वारे स्त्री-पुरुषाचे नाते अधिक खुले होईल. – हिना खान, पत्रकार