Ganesh Naik : नवी मुंबई महानगरपालिकेच्या अधिकृत निमंत्रण पत्रिकेतून उपमुख्यमंत्री एकनाथ शिंदे यांचे नाव वगळल्यामुळे शिवसैनिकांनी निषेध नोंदवला. त्यांनी भाजपचे मंत्री आणि शिंदे यांचे राजकीय विरोधक गणेश नाईक (Ganesh Naik) यांना काळे झेंडे दाखवले.

दुसरीकडे, बेलापूरच्या भाजप आमदार मंदा म्हात्रे यांनी दावा केला की, बदललेल्या निमंत्रण पत्रिकेत चुकीच्या पद्धतीने नाईक (Ganesh Naik) यांचे श्रेय दर्शवण्यात आले होते. त्यात हे प्रकल्प त्यांच्या मंत्रीपदाच्या निधीतून राबवण्यात आल्याचा दावा करण्यात आला होता.

एका महत्त्वाच्या कार्यक्रमासाठी वाटप करण्यात आलेल्या निमंत्रण पत्रिकांमधून शिंदे यांचे नाव गायब असल्याचे लक्षात आल्यावर सोमवारी हा वाद निर्माण झाला. यामुळे संतप्त झालेल्या शिवसैनिकांनी उद्घाटनासाठी आयोजित कार्यक्रमाच्या स्थळाबाहेर गणेश नाईक यांना काळे झेंडे दाखवले आणि ठाणे जिल्ह्याचे पालकमंत्री असलेल्या शिंदे यांच्या समर्थनार्थ घोषणाबाजी केली.

खासदार नरेश म्हस्के यांनी दावा केला की, शिंदे यांचे नाव जाणीवपूर्वक वगळण्यात आले होते. नवी मुंबई महानगरपालिकेच्या आयुक्तांनी त्यांना माहिती दिली होती की, राज्याच्या अधिकृत शिष्टाचाराप्रमाणे प्रशासनाने सुरुवातीला शिंदे यांचे नाव समाविष्ट केले होते. मात्र, त्यानंतर महापौरांच्या कार्यालयाने प्रशासनाचा निर्णय डावलून शिंदे यांचे नाव वगळले आणि सुधारित निमंत्रण पत्रिका प्रसारित केली, असा दावा म्हस्के यांनी केला.

विशेष म्हणजे, नवी मुंबईचे महापौरपद भाजपकडे आहे आणि हे शहर भाजप नेते व शिंदे यांचे राजकीय विरोधक गणेश नाईक (Ganesh Naik) यांचा बालेकिल्ला मानले जाते. निषेध म्हणून म्हस्के आणि स्थानिक शिवसेना नेत्यांनी या कार्यक्रमावर बहिष्कार टाकला.