पुणे : मोक्कानुसार कारवाई केलेल्या कुख्यात गुंड गजा उर्फ गजानन मारणे याला येरवडा कारागृहातून सांगली कारागृहात वर्ग करताना एका ढाब्यावर मटण बिर्याणी खाऊ घातल्याचा धक्कादायक प्रकार उघडकीस आला आहे. त्यासोबत प्रवासादरम्यान मारणेच्या टोळीतील ८० ते १०० जणांनी अलिशान मोटारीतून पुणे ते सांगली असा पोलीस व्हॅन मागोमाग प्रवास केला. हा प्रकार तीन मार्चला घडला आहे. याचे व्हिडिओ समाज माध्यमावर प्रसारित झाल्यावर प्रकरण उघडकीस आले. या प्रकरणाची पोलीस आयुक्त अमितेश कुमार यांनी गांभीर्याने दखल घेत संबंधीत पोलीस अधिकाऱ्यांवर कारवाईचा बडगा उगारला आहे. तसेच, मारणे टोळीतील तीघा सराईतांवरही कायदेशीर कारवाई करण्यात येणार आहे. गुन्हे शाखेची पथके रवाना करण्यात आली आहेत. आरोपींनी प्रवासासाठी वापरेल्या आलिशान गाड्याही जप्त करण्यात आल्या आहेत. कुख्यात गुंड गजानन मारणेसह टोळीविरूद्ध २४ फेब्रुवारीला मोक्का कारवाई करण्यात आली होती. समाज माध्यमावर व्हिडिओ प्रसारित याप्रकरणी ओम धर्मजिज्ञासू, किरण पडवळ, अमोल तापकीर यांना पोलिसांनी तातडीने अटक केली होती. त्यानंतर गजानन मारणे याला अटक करण्यात आली. मात्र, येरवडा कारागृहातंर्गत टोळ्यांमध्ये होणारी मारामारी तसेच स्पेशल ट्रीटमेंट मिळू नये म्हणून त्याला येरवडा कारागृहातून सांगली कारागृहात हलवण्याचा निर्णय गुन्हे शाखेकडून घेण्यात आला. त्यानुसार ३ मार्चला एका सहायक पोलीस निरीक्षकासह पाचजण अमलादारांनी पोलीस व्हॅनमध्ये मारणेला बसवून सांगलीच्या दिशेने प्रवास सुरू केला. दरम्यान, संबंधित अमलदारांनी मारणेच्या टोळीतील इतरांना वेळोवेळी माहिती दिली. त्यामुळे तीघा सराईतांसह मारणे टोळीतील ८० ते १०० मारणे समर्थकांनी अलिशान मोटारीतून पोलीस व्हॅनसोबत प्रवास केला. त्यानंतर एक ढाब्यावर त्यांनी गजानन मारणे याला मटण बिर्याणी खाऊ घातली. याचा व्हिडिओ व्हायरल झाल्यानंतर पोलीस आयुक्त अमितेशकुमार यांनी कारवाई केली. पाच पोलीस निलंबित सहायक पोलीस निरीक्षक सुरजकुमार राजगुरू, हवालदार महेश बामगुडे, हवालदार सचिन मेमाणे, हवालदार रमेश मेमाणे, शिपाई राहुल परदेशी अशी निलंबित केलेल्या पोलिसांची नावे आहेत. तर सराईत सतीश शिळीमकर, विशाल धुमाळ, बाळकृष्ण उर्फ पांड्या मोहिते यांच्याविरूद्ध गुन्हा दाखल केला आहे. दरम्यान, आरोपींनी प्रवासासाठी वापरलेल्या चार अलिशान मोटारी जप्त केल्याची माहिती वरिष्ठ पोलीस अधिकार्यांनी दिली आहे
