Vehicle Fines :  राज्यातील 1 एप्रिल 2019 पूर्वी नोंदणी झालेल्या सर्व वाहनांवर उच्च सुरक्षा नोंदणी क्रमांक प्लेट (HSRP) बसविण्यासाठी शासनाने दिलेली 30 जून 2026 ही अंतिम मुदत आता अवघ्या एका दिवसावर येऊन ठेपली आहे. मुदत संपल्यानंतर 1 जुलैपासून HSRP नंबर प्लेट न बसविणाऱ्या वाहनधारकांवर मोटार वाहन कायद्यानुसार दंडात्मक कारवाई करण्यात येणार असल्याची माहिती परिवहन विभागाने दिली आहे.

परिवहन विभाग आणि पोलिसांकडून संयुक्त अथवा स्वतंत्रपणे विशेष तपासणी मोहीम राबविण्यात येणार असून, नियमांचे पालन न करणाऱ्या वाहनधारकांवर कारवाई केली जाणार आहे. तसेच HSRP नंबर प्लेट नसलेल्या वाहनांना प्रादेशिक परिवहन कार्यालयातील (RTO) अनेक महत्त्वाच्या सेवाही नाकारण्यात येणार आहेत.

आरटीओच्या महत्त्वाच्या सेवांवर निर्बंध –

HSRP नंबर प्लेट नसलेल्या वाहनांचे हस्तांतरण, पत्ता बदल, वाहनावरील कर्जबोजा चढविणे अथवा उतरविणे, पुनर्नोंदणी, वाहनातील तांत्रिक बदल तसेच इतर विविध आरटीओ सेवा 1 जुलैपासून उपलब्ध होणार नाहीत. मात्र, वाहनांच्या फिटनेस प्रमाणपत्राच्या नूतनीकरणासाठी सध्या ही अट लागू करण्यात आलेली नसल्याने वाहनधारकांना काहीसा दिलासा मिळणार आहे.

अपॉइंटमेंट घेतलेल्यांना तात्पुरता दिलासा –

30 जूनपर्यंत अधिकृत पोर्टलवर ऑनलाइन नोंदणी करून HSRP बसविण्यासाठी अपॉइंटमेंट घेतलेल्या वाहनधारकांना दंडात्मक कारवाईतून तात्पुरती सूट देण्यात आली आहे. मात्र, ज्यांनी अद्याप नोंदणी केलेली नाही, अशा वाहनधारकांना थेट दंडाचा सामना करावा लागू शकतो.

राज्यात HSRP बसविण्याचे काम सुरळीत पार पाडण्यासाठी शासनाने राज्याचे तीन झोनमध्ये विभाजन केले असून, त्यासाठी रोझमेर्टा टेक्नॉलॉजीज, रिअल इंडस्ट्रीज आणि एफटीए HSRP सोल्यूशन्स या अधिकृत कंपन्यांची नियुक्ती करण्यात आली आहे.

शासनाकडून अधिकृत दर निश्चित –

सर्वसामान्यांची आर्थिक लूट होऊ नये, यासाठी शासनाने HSRP नंबर प्लेटचे अधिकृत दर निश्चित केले आहेत. त्यानुसार दुचाकी वाहनांसाठी 450 रुपये, तीनचाकी वाहनांसाठी 500 रुपये, तर हलकी मोटार वाहने तसेच मध्यम व अवजड व्यावसायिक वाहनांसाठी 745 रुपये शुल्क निश्चित करण्यात आले आहे. या दरात फिटमेंट शुल्काचा समावेश असून जीएसटी अतिरिक्त आकारण्यात येणार आहे.

केंद्रीय मोटार वाहन नियम, 1989 मधील नियम 50 तसेच मोटार वाहन अधिनियमातील कलम 177 अन्वये ही कारवाई करण्यात येणार आहे.

शासकीय वाहनांनाही आदेश –

राज्यातील सर्व शासकीय व निमशासकीय कार्यालयांनाही त्यांच्या ताब्यातील वाहनांवर 30 जूनपूर्वी HSRP नंबर प्लेट बसविण्याचे निर्देश देण्यात आले आहेत. त्यामुळे वाहनधारकांनी दंडात्मक कारवाई तसेच आरटीओमधील अडचणी टाळण्यासाठी तातडीने HSRP नंबर प्लेट बसवून घ्यावी, असे आवाहन परिवहन विभागाने केले आहे.