Top 10 News : १) विदर्भ अन् मराठवाड्यात सप्टेंबरमध्येही पाऊस कमी राहण्याची शक्यता; हवामान विभागाचा अंदाज

महाराष्ट्रातील शेतकऱ्यांची चिंता वाढवणारी हवामान विभागाची माहिती समोर आलीय. विदर्भ आणि मराठवाड्यात ऑगस्टनंतर सप्टेंबरमध्येही पावसाचा जोर कमी राहण्याची शक्यता वर्तवण्यात आलीय. एल-निनोच्या प्रभावामुळे या भागातील पावसाची तूट आणखी वाढण्याचा अंदाज आहे. विदर्भातील सध्याची पावसाची तूट २२ ते २५ टक्क्यांदरम्यान असून, ऑगस्टअखेर ती ३० टक्क्यांपर्यंत जाण्याची शक्यता आहे. मराठवाड्यातही काही भागांत आज-उद्या पावसाची शक्यता असली, तरी त्यानंतर मोठी उघडीप राहण्याचा अंदाज आहे. २७ ऑगस्टपर्यंत पाऊस कमी राहण्याची शक्यता असल्याने कृषी विद्यापीठाने शेतकऱ्यांना सूक्ष्म सिंचनाचा वापर आणि आवश्यकतेनुसार कीड-रोग नियंत्रणासाठी फवारणी करण्याचा सल्ला दिलाय. त्यामुळे शेतकऱ्यांनी पाण्याचे नियोजन करण्याचे आवाहन करण्यात आलेय. (Top 10 News)

२) शिवसेनेचे धनुष्यबाण चिन्ह गोठवा, सिब्बल यांची मागणी

शिवसेनेच्या धनुष्यबाण चिन्हाच्या वादात कपिल सिब्बल यांनी सर्वोच्च न्यायालयात मोठी मागणी केलीय. उद्धव ठाकरे गटाच्या वतीने पाच दिवस युक्तिवाद केल्यानंतर आज सिब्बल यांचा अंतिम युक्तिवाद झाला. यावेळी त्यांनी विधिमंडळ पक्ष आणि राजकीय पक्ष यांच्यातील फरक न्यायालयाच्या निदर्शनास आणून दिला. विधानसभा अध्यक्षांनी चुकीचा निर्णय दिला असल्यास सर्वोच्च न्यायालयाकडून दिलासा मिळू शकतो, असा युक्तिवादही सिब्बल यांनी केला. दरम्यान, अंतिम युक्तिवादात सिब्बल यांनी सर्वोच्च न्यायालयाकडे महत्त्वाची मागणी केलीय. शिवसेनेचे धनुष्यबाण हे निवडणूक चिन्ह गोठवण्यात यावे, अशी विनंती त्यांनी केलीय. सिब्बल यांच्या या मागणीमुळे शिवसेना पक्ष आणि निवडणूक चिन्हाच्या वादाला नवं वळण मिळालं असून, आता सर्वोच्च न्यायालय या मागणीवर काय भूमिका घेणार, याकडे सर्वांचं लक्ष लागलंय. (Top 10 News)

३) विजेचा धक्का बसून दोन भावांचा मृत्यू, दौंड तालुक्यातील घटना

दौंड तालुक्यात विजेचा धक्का बसून दोन चुलत भावांचा दुर्दैवी मृत्यू झाल्याची हृदयद्रावक घटना समोर आलीय. सोनवणेमळा येथे घरातील विद्युत काम सुरू असताना हा अपघात झाला. ओम भोईटे यांना अचानक विजेचा जोरदार धक्का बसला. हे पाहून त्यांचा चुलत भाऊ रोहित भोईटे मदतीसाठी धावला. मात्र, ओमला वाचवण्याच्या प्रयत्नात रोहितलाही विजेचा तीव्र धक्का बसला. दोघेही गंभीररीत्या भाजले. कुटुंबीयांनी त्यांना तातडीने यवत ग्रामीण रुग्णालयात दाखल केले. मात्र डॉक्टरांनी दोघांनाही मृत घोषित केले. ओम आणि रोहित यांच्या आईनेही मुलांना वाचवण्यासाठी धाव घेतली होती, मात्र त्या सुदैवाने बचावल्या. या घटनेनंतर सोनवणेमळा गावावर शोककळा पसरलीय. (Top 10 News)

४) सरकारी कर्मचाऱ्यांच्या महागाई भत्त्यात २ टक्के वाढ; ५८ टक्क्यांवरून ६० टक्क्यांवर

राज्य सरकारी कर्मचाऱ्यांच्या महागाई भत्त्यात दोन टक्क्यांनी वाढ करण्यात आलीय. राज्य सरकारी कर्मचाऱ्यांचा महागाई भत्ता आता ५८ टक्क्यांवरून थेट ६० टक्के करण्यात आलाय. ही वाढ १ जानेवारी २०२६पासून पूर्वलक्षी स्वरूपात लागू होणार आहे. विशेष म्हणजे जानेवारी ते जुलै २०२६ या सात महिन्यांची महागाई भत्ता वाढीची थकबाकीही कर्मचाऱ्यांना मिळणार आहे. राज्याच्या वित्त विभागाने यासंदर्भातील शासन निर्णय जारी केलाय. वाढीव महागाई भत्ता आणि सात महिन्यांची थकबाकी ऑगस्ट महिन्याच्या वेतनासोबत रोखीने देण्याचे आदेश देण्यात आलेत. सातव्या वेतन आयोगानुसार सुधारित वेतनसंरचनेतील मूळ वेतनावर हा वाढीव भत्ता लागू असेल. त्यामुळे राज्यातील सरकारी कर्मचारी, पात्र कर्मचारी, अनुदानित संस्था आणि जिल्हा परिषद कर्मचाऱ्यांना या निर्णयाचा लाभ मिळणार आहे. (Top 10 News)

५) स्टॅलिन यांची भ्रष्टाचाराची फाईल वेळेवर उघडीन; : मुख्यमंत्री सी. जोसेफ विजय

तमिळनाडूच्या राजकारणात मुख्यमंत्री सी. जोसेफ विजय यांच्या एका विधानाने खळबळ उडालीय. विधानसभेत रस्ते बांधणीतील कथित अनियमिततेवरून सत्ताधारी आणि विरोधी आमदारांमध्ये जोरदार वाद झाला. यावेळी विजय यांनी मागील डीएमके सरकारवर भ्रष्टाचाराचे आरोप करत, “योग्य वेळी भ्रष्टाचाराच्या फाईल्स उघडेन”, असा इशारा दिलाय. आपल्या टेबलवर दोन फाईल्स असल्याचं सांगत त्यांनी या मुद्द्यावर आपल्यावर दबाव आणू नका, असंही स्पष्ट केलंय. त्यामुळे डीएमके आणि टीव्हीकेमधील राजकीय संघर्ष आणखी तीव्र होण्याची शक्यता आहे. दरम्यान, भ्रष्टाचाराविरोधात तमिळनाडू सरकार मोठं पाऊल उचलणार असून डीव्हीएसी अंतर्गत सोशल मीडिया मॉनिटरिंग सेंटर स्थापन करण्यात येणार आहे. यासाठी ५० लाख रुपयांची तरतूद करण्यात आली असून, सोशल मीडियावरील भ्रष्टाचारासंबंधी तक्रारी आणि पुरावे जतन करण्यासाठी हे केंद्र २४ तास काम करणार आहे. (Top 10 News)

६) कॅनडावरील शुल्काला तीन दिवसांची स्थगिती; डोनाल्ड ट्रम्प यांची घोषणा

अमेरिका-कॅनडा व्यापार तणावाच्या पार्श्वभूमीवर डोनाल्ड ट्रम्प यांनी मोठी घोषणा केलीय. कॅनडातील काही वस्तूंवर लागू होणारे ५० टक्के आयात शुल्क तीन दिवसांसाठी स्थगित करण्यात आले आहे. दोन्ही देशांमध्ये व्यापार कराराला अंतिम स्वरूप देण्यासाठी चर्चा सुरू असतानाच हा निर्णय घेण्यात आलाय. प्रस्तावित शुल्क सुमारे २० अब्ज डॉलरच्या कॅनेडियन वस्तूंवर लागू होणार होते. यात हॉकी स्टिक्स, इलेक्ट्रॉनिक्स, प्लास्टिक आणि बांधकाम साहित्याचा समावेश आहे. ट्रम्प यांच्या म्हणण्यानुसार दोन्ही देशांमध्ये करार झाला असून, आता कागदपत्रांना अंतिम मंजुरी मिळणे बाकी आहे. कॅनडाचे पंतप्रधान मार्क कार्नी यांनीही चर्चेत महत्त्वपूर्ण प्रगती झाल्याचे सांगितले. त्यामुळे शुल्काचा तणाव कमी होऊन अमेरिका-कॅनडा व्यापार संबंध सुधारण्याची शक्यता व्यक्त केली जातेय. (Top 10 News)

७) पालकांची चिंता मिटली; आता 13 ते 17 वर्षे वयोगटातील मुलांसाठी खास ChatGPT

किशोरवयीन मुलांचा ChatGPT वापर अधिक सुरक्षित आणि वयाला अनुरूप करण्यासाठी OpenAI ने 13 ते 17 वर्षांच्या मुलांसाठी विशेष Teen Experience उपलब्ध करून दिलाय. हे स्वतंत्र अॅप नसून ChatGPT मधीलच सुरक्षित अनुभव आहे. यात संवेदनशील किंवा वयाला अनुचित सामग्री, धोकादायक व्हायरल चॅलेंजेस, हिंसक किंवा लैंगिक स्वरूपाच्या संवादांवर अतिरिक्त सुरक्षा उपाय लागू होतात. पालक आपल्या मुलाचे खाते लिंक करून काही सेटिंग्ज नियंत्रित करू शकतात. यात Quiet Hours, Voice Mode, Image Generation आणि Study Mode यांसारखे पर्याय आहेत. मात्र, पालकांना मुलांचे चॅट्स थेट वाचता येत नाहीत. त्यामुळे अभ्यास, माहिती आणि कौशल्यविकासासाठी AI वापरताना किशोरवयीन मुलांना अधिक सुरक्षित वातावरण मिळण्याचा प्रयत्न करण्यात आलाय. (Top 10 News)

८) रॉयल एनफील्ड क्लासिक 350 चे ‘गोरखा एडिशन’ लॉन्च

रॉयल एनफील्डने क्लासिक 350 चे खास ‘गोरखा एडिशन’ बाजारात लॉन्च केलेय. गोरखा रेजिमेंटच्या शौर्याला मानवंदना देण्यासाठी तयार करण्यात आलेल्या या बाईकची एक्स-शोरूम किंमत २ लाख १० हजार ६८४ रुपये आहे. या मॉडेलचे बुकिंग १८ ऑगस्ट २०२६ पासून सुरू झाले आहे. बाईकला ‘गोरखा ग्रीन’ मॅट फिनिश, टाकीवर खास बॅज आणि साईड पॅनेलवर क्रॉस्ड खुकरीचे चिन्ह देण्यात आलेय. क्रोम फिनिशमुळे बाईकला आकर्षक लूक मिळतो. इंजिनमध्ये कोणताही बदल करण्यात आलेला नसून, ३४९ सीसी J-सिरीज इंजिन २०.१ बीएचपी पॉवर आणि २७ एनएम टॉर्क जनरेट करते. यासोबत ५-स्पीड गिअरबॉक्स, असिस्ट-स्लिपर क्लच आणि यूएसबी टाइप-सी फास्ट चार्जिंग पोर्ट मिळतो. (Top 10 News)

९) गोविंदासोबत घटस्फोट नाही, सुनीताने मागे घेतली केस

गोविंदा आणि सुनीता अहुजा यांच्या नात्याबाबत गेल्या काही दिवसांपासून सुरू असलेल्या चर्चांना आता नवा ट्विस्ट मिळालाय. सुनीता फॅमिली कोर्टात गेल्याने दोघांच्या घटस्फोटाच्या चर्चांना उधाण आलं होतं. मात्र, समोर आलेल्या वृत्तानुसार सुनीता घटस्फोटाचा खटला दाखल करण्यासाठी नव्हे, तर आधी दाखल केलेली केस मागे घेण्यासाठी कोर्टात गेल्याचं सांगितलं जातंय. कोर्टाबाहेर सुनीता मुलगा यशवर्धनसोबत दिसली. यावेळी तिने माध्यमांच्या प्रश्नांना फारसं उत्तर दिलं नाही. गोविंदाचे मॅनेजर शशी सिन्हा यांनीही याबाबत प्रतिक्रिया दिली. कौटुंबिक विषय घरातच सोडवले पाहिजेत आणि या प्रकरणाचा तमाशा होऊ नये, असं त्यांनी म्हटलंय. त्यामुळे गोविंदा आणि सुनीता यांच्यातील नातं आता नेमकं कोणत्या टप्प्यावर आहे, याकडे चाहत्यांचं लक्ष लागलंय. (Top 10 News)

१०) गॉलमधील श्रीलंकेविरुद्धच्या विजयानंतरही भारतासाठी डब्ल्यूटीसी फायनलचा मार्ग खडतर

श्रीलंकेला १६५ धावांनी नमवून मिळवलेल्या १२ गुणांनंतरही भारतीय संघ ५३.३३ टक्के पीसीटीसह जागतिक कसोटी अजिंक्यपद गुणतालिकेत पाचव्या क्रमांकावर कायम आहे. सध्या ऑस्ट्रेलिया (७७.७८ टक्के) पहिल्या, तर ऑस्ट्रेलियाला हरवणारा बांगलादेश (६६.६७ टक्के) चौथ्या स्थानावर आहे. भारताला अंतिम फेरीत पोहोचण्यासाठी उर्वरित ८ पैकी किमान ७ सामने जिंकावे लागतील. आगामी मालिकांमध्ये भारताला केवळ एकाच पराभवाची मुभा असून, २ सामने हरल्यास फायनलची आशा पूर्णपणे संपुष्टात येईल. (Top 10 News)