शिर्डी : स्वातंत्र्यवीर सावरकरांना हिंदू जनतेनं स्वातंत्र्यवीर आणि हिंदूह्रदयसम्राट अशा पदव्या बहाल केलेल्या आहेत. त्या भारतरत्ना पेक्षाही मोठ्या असून, त्यांना भारतातील सर्वोच्च पदवी भारतरत्न देण्याची गरज नसल्याचे खुद्द स्वातंत्र्यवीर सावरकर यांचे नातू रणजीत सावरकर यांनी शिर्डीत सांगितले. शिर्डीतील मंदिर परिषदेच्या निमित्ताने आलेल्या सावरकर यांनी माध्यमांशी संवाद साधला. यावेळी ते म्हणाले, भारतरत्न हा पुरस्कार दिग्गजांना दिला जातो. मात्र त्याचबरोबर काही अशा लोकांना देखील दिला गेला की ज्यांचे नाव आपण घेऊ शकत नाही. भाजपा सावरकरांना भारतरत्न कधी देणार, अशी विचारणा अलीकडे उद्धव ठाकरे करत आहेत. यावर बोलताना रणजीत सावकर म्हणाले की, ज्यांनी आपला पक्ष कॉग्रेसच्या दावणीला नेवून बांधला, जे राहुल गांधीच्या मांडीला मांडी लावून बसतात, ज्यांना सावरकरांच तत्वज्ञान मान्य नाही, त्यांनी सावरकरांना भारतरत्नाची मागणी करावी? त्यांचा काय संबध? अशा शब्दांत रणजीत सावरकर यांनी उद्धव ठाकरेंवर टीका केली. हिंदूंच्या टॅक्सवर बांग्लादेशी घुसखोर मुस्लीम समुदायाची लोकसंख्या वाढत आहे. लोकसंख्या नियंत्रण कायदा आणला पाहिजे, अन्यथा हिंदूची लोकसंख्या वाढवली पाहिजे, असेही ते म्हणाले. मुस्लिम लोकसंख्या आठ टक्क्यांवरून बावीस टक्के झाली असून, पुढील निवडणूक मुस्लिम समुदाय ठरवणार, अशी परिस्थिती निर्माण झाल्याचे सावरकर म्हणाले.
