PM Kisan Fraud – प्रधानमंत्री किसान सम्मान निधि (PM-किसान) योजनेच्या नावाखाली शेतकऱ्यांना फसवणारे बनावट मेसेज पाठवले जात आहेत. ‘4000 रुपये अतिरिक्त हप्ता मिळवण्यासाठी लिंकवर क्लिक करा,’ असे खोटे संदेश पाठवून ठग शेतकऱ्यांची मेहनतीची कमाई लुटत आहेत. यामुळे शेतकऱ्यांचे आर्थिक नुकसान तर होतच आहे, शिवाय त्यांचा खरा हप्ताही अडकण्याचा धोका आहे.

याबाबत कृषी मंत्रालयाने शेतकऱ्यांना सावध राहण्याचा इशारा दिला आहे. मंत्रालयाने शेतकऱ्यांना फक्त अधिकृत संकेतस्थळ www.pmkisan.gov.in वरून माहिती घेण्याचा सल्ला दिला आहे. फसव्या मेसेजमध्ये अतिरिक्त रक्कम किंवा सबसिडीचे आमिष दाखवले जाते. फिशिंग लिंक्सद्वारे आधार आणि बँक खात्याची माहिती चोरण्याचा प्रयत्न होतो. अशा मेसेजमुळे आर्थिक फसवणूक, वैयक्तिक माहितीची चोरी आणि योजनेचा लाभ गमावण्याचा धोका आहे.

कसे राहाल सुरक्षित?

-फक्त अधिकृत PM-किसान पोर्टल किंवा @pmkisanofficial या X आणि फेसबुक हँडलवर माहिती तपासा.
– अनोळखी लिंक्सवर क्लिक करू नका किंवा वैयक्तिक माहिती शेअर करू नका.
– E-KYC पूर्ण करा, आधार बँक खात्याशी लिंक करा आणि जमिनीचे रेकॉर्ड अपडेट ठेवा.

PM-किसान योजना काय आहे?

ही योजना शेतकऱ्यांना दरवर्षी 6000 रुपये (2000 रुपयांच्या तीन हप्त्यांत) देते. 20वा हप्ता लवकरच येणार आहे. शेतकऱ्यांनी रेकॉर्ड अपडेट ठेवावे आणि फसव्या मेसेजपासून सावध राहावे, असे मंत्रालयाचे आवाहन आहे.

हप्त्याचे स्टेटस कसे तपासाल?

– www.pmkisan.gov.in वर जा.
– ‘बेनिफिशियरी स्टेटस’वर क्लिक करा.
– आधार किंवा बँक खाते क्रमांक टाका आणि ‘डेटा’वर क्लिक करा.