नांदेड – ज्येष्ठ नेत्या आणि माजी केंद्रीय राज्यमंत्री सूर्यकांता पाटील यांनी अखेर राजकीय संन्यास घेतला आहे. याबाबत त्यांनी फेसबुकच्या माध्यमातून भावनिक पोस्ट करत आपला निर्णय जाहीर केला आहे. 43 वर्षांच्या राजकीय कारकिर्दीला त्यांनी आज रामराम केला.

“43 वर्षे राजकारणात होते, एखाद्या राजकुमारीसारखी राहिले. 400 रुपयांची साडी 4000 हजाराच्या थाटात नेसली. मिळालेले काम मन लावून केले, आता आजूबाजूला असणारे लोक अनोळखी वाटत आहेत आणि अश्‍या अनोख्या प्रांतात माझ्यासारखी मनस्वी रमू शकत नाही. राजीनामा लिहून तयार होता, पण मी आहेच कोण म्हणून एवढा शो करायचा’, असे त्यांनी फेसबुकवर लिहिले आहे.

सूर्यकांता पाटील यांच्या राजकीय प्रवासाची सुरुवात कॉंग्रेसमधून झाली. त्यानंतर त्यांनी राष्ट्रवादी कॉंग्रेसमध्ये प्रवेश केला होता. 2014 मध्ये त्यांनी भाजपमध्ये प्रवेश केला. मात्र भाजपमध्ये त्यांचे मन रमताना दिसत नाही. कॉंग्रेस आणि राष्ट्रवादीमध्ये त्यांनी अनेक पदं भूषवली आहेत.

पाटील यांनी चार वेळा खासदार, एक वेळा आमदार म्हणून हिंगोली-नांदेड मतदारसंघाचे प्रतिनिधित्व केलेले आहे. त्या ग्रामविकास मंत्रालयात राज्यमंत्री होत्या. त्यानंतर संसदीय कार्य मंत्रालयाचे राज्यमंत्रीपदही त्यांनी भूषवले होते.

1980 मध्ये त्या हदगाव मतदारसंघातून पहिल्यांदा आमदारपदी निवडून आल्या होत्या. 1986 मध्ये सूर्यकांता पाटील कॉंग्रेसकडून राज्यसभेवर गेल्या होत्या. 1991, 1998 आणि 2004 असे तीन वेळा त्या लोकसभेत खासदारपदी निवडून आल्या.