Satyendar Jain Booked For Taking Bribe | आम आदमी पक्षाच्या (आप) अडचणी सातत्याने वाढताना दिसत आहे. आपचे माजी मंत्री सत्येंद्र जैन यांच्याविरोधात आणखी एक एफआयआर दाखल करण्यात आली आहे. दिल्लीच्या लाचलुचपत प्रतिबंधक विभागाने (एसीबी) जैन गुन्हा दाखल केला आहे. 571 कोटी रुपयांच्या सीसीटीव्ही प्रकल्पातील कथित अनियमिततेशी संबंधित प्रकरणात जैन यांच्याविरोधात तक्रार दाखल करण्यात आली आहे. जैन यांच्यावर या प्रकरणात 7 कोटी रुपयांची लाच घेतल्याचा आरोप आहे. दिल्ली सरकारने सर्व 70 विधानसभा जागांवर एकूण 1.4 लाख सीसीटीव्ही कॅमेरे बसवण्यासाठी भारत इलेक्ट्रॉनिक्स लिमिटेडला (BEL) कंत्राट दिले होते. हे कंत्राट 571 कोटी रुपयांचे होते. मात्र, सीसीटीव्ही बसवण्यास विलंब झाल्याचे कारण देत कंपनीला 16 लाख कोटी रुपयांचा दंड ठोठावण्यात आला होता. जैन यांनी हा दंड माफ करण्यासाठी 7 कोटी रुपयांची लाच घेतल्याचा आरोप केला जात आहे. एसीबीचे सहआयुक्त मधुर वर्मा यांनी या प्रकरणाची माहिती दिली. एका बातमीतून या प्रकाचे आरोप सर्वात आधी समोर आले होते. त्यानंतर तपासात जैन यांनी 7 कोटी रुपयांची लाच घेतल्याचे समोर आले. याप्रकरणात तक्रारदाराने निकृष्ट दर्जाचे कॅमेरे बसवण्यात आल्याची तक्रार केली होती. तसेच, ज्या कंत्राटदाराला 1.4 लाख अतिरिक्त कॅमेरे बसवण्याचे कंत्राट मिळाले होते. त्याच कंत्राटदारामार्फत 7 कोटी रुपयांची लाच देण्यात आल्याची तक्रार आहे. तसेच, या प्रकरणी खटला चालवण्याची परवानगी आधीच घेण्यात आल्याची माहिती एसीबीने दिली. दरम्यान, सत्येंद्र जैन यांच्यावर याआधी विविध घोटाळ्यांचे आरोप झाले आहेत. दिल्लीतील सरकारी शाळांमध्ये वर्गखोल्या बांधताना 1300 कोटी रुपयांचा कथित घोटाळा करण्यात आल्याचाही आरोप त्यांच्यावर आहे. सत्येंद्र जैन यांची मनी लाँड्रिग प्रकरणातही चौकशी केली जात आहे.
