मुंबई – महाराष्ट्र विधानसभेची निवडणूक भारतीय जनता पक्ष आणि त्याच्या मित्रपक्षांनी जिंकली. त्यामुळे गेल्या दोन कामकाजाच्या दिवसांमध्ये शेअर बाजाराचे निर्देशांक चार टक्क्याने वाढले आहेत. मात्र परदेशी संस्थागत गुंतवणूकदारांची भारतीय शेअर बाजारात विक्री चालूच आहे.

नोव्हेंबर महिन्यात आतापर्यंत या गुंतवणूकदारांनी 26,533 कोटी रुपये काढून घेतले आहेत. समाधानाची बाब म्हणजे या गुंतवणूकदारांच्या विक्रीचे प्रमाण काही प्रमाणात कमी झाले आहे. ऑक्टोबर महिन्यात या गुंतवणूकदारांनी भारतीय शेअर बाजारातून 94,014 कोटी रुपये म्हणजे 11.2 अब्ज डॉलरची गुंतवणूक काढून घेतली होती. त्या तुलनेत नोव्हेंबर महिन्यामध्ये 26,533 कोटी रुपयांची गुंतवणूक काढून घेतली आह. भारतीय कंपन्यांच्या शेअरचे भाव आवश्यकतेपेक्षा जास्त पातळीवर आहेत असे बर्‍याच परदेशी गुंतवणूकदारांना वाटत आहे.

दुसर्‍या तिमाहीत भारतीय कंपन्यांचा नफा कमी झाला आहे. दरम्यानच्या काळात चीनने बर्‍याच सवलती जाहीर केल्या होत्या. त्यामुळे बरीच परदेशी गुंतवणूक भारतातून चीनकडे वळाली आहे. दरम्यानच्या काळामध्ये अमेरिकेने आक्रमक व्याजदर कपात कमी करण्याचे ठरविले आहे. अशा परिस्थितीत परदेशी गुंतवणूकदार भारतीय शेअर बाजाराकडे दुर्लक्ष करीत आहेत.

Stock market : झोमॅटोच्या शेअरची आगेकूच, सेन्सेक्स निर्देशांकात समावेश झाल्याचा परिणाम…

आता अमेरिकेचे नवे ट्रम्प प्रशासन भारताबाबत काय भूमिका घेते, महागाई कशी वाटचाल करते आणि तिसर्‍या तिमाहीत भारतीय कंपन्या कसे ताळेबंद जाहीर करतात यावर परदेशी गुंतवणूकदारांचे निर्णय अवलंबून राहण्याची शक्यता आहे. भारतातील महागाई साडेसहा टक्क्यांपेक्षा जास्त झाले आहे त्यामुळे भारतात व्याजदर कपातील उशीर लागणार आहे अशा परिस्थितीत भांडवलाचा वापर कमी होऊन कंपन्यांच्या ताळेबंदावर त्याचा परिणाम दीर्घकाळ पडू शकतो असे या गुंतवणूकदारांना वाटत आहे.