leena bhagwat : “आता पुढचे काही दिवस…”; अभिनेत्री लीना भागवत यांचा मोठा खुलासा, त्या फोटोंमुळे चाहत्यांची चिंता वाढली
leena bhagwat : गेल्या काही दिवसांपासून त्यांना “मेरी आवाज ही पहचान है...”हे गाणे सतत आठवत असल्याचे सांगत त्यांनी एका कलाकारासाठी त्याचा आवाज हीच त्याची खरी ताकद असल्याचे म्हटले आहे.
leena bhagwat : लोकप्रिय अभिनेत्री लीना भागवत यांच्या विशेष भूमिकेमुळे गाजत असलेल्या ‘आमने सामने’ या नाटकाने रसिक प्रेक्षकांची मने जिंकली आहेत. नाटकाच्या अनेक प्रयोगांना हाऊसफुल्ल प्रतिसाद मिळत असतानाच लीना भागवत यांनी सोशल मीडियावर केलेल्या एका पोस्टमुळे त्यांच्या चाहत्यांमध्ये चिंतेचे वातावरण निर्माण झाले आहे.
या नाटकात लीना भागवत यांच्यासह मंगेश कदम, रोहन गुजर, केतकी विलास या कलाकारांच्या महत्त्वपूर्ण भूमिका आहेत. लीना यांनी आपल्या इंन्स्टाग्राम पोस्टमध्ये लिहिले की, आता पुढचे काही दिवस “कसं वाटलं नाटक?” असे विचारता किंवा त्यावर प्रतिक्रिया देता येणार नाही. इतकेच नव्हे, तर काहीच बोलता येणार नसल्याचेही त्यांनी नमूद केले आहे.
गेल्या काही दिवसांपासून त्यांना “मेरी आवाज ही पहचान है…”हे गाणे सतत आठवत असल्याचे सांगत त्यांनी एका कलाकारासाठी त्याचा आवाज हीच त्याची खरी ताकद असल्याचे म्हटले आहे. नेमके काय झाले आहे, याबाबत लीनांनी पोस्टमध्ये स्पष्ट माहिती दिलेली नाही. मात्र, डॉक्टरांनी त्यांना सक्त ताकीद दिल्याचे त्यांनी सांगितले आहे. “पेहचान टिकवायची असेल तर एक छोटी procedure करावीच लागेल,” असे डॉक्टरांनी सांगितल्याचेही त्यांनी नमूद केले. त्यानंतर अखेर काल ही प्रक्रिया पार पडल्याची माहिती त्यांनी चाहत्यांना दिली.
View this post on Instagram
लीना भागवत यांनी पोस्टसोबत दोन फोटोही शेअर केले आहेत. एका फोटोमध्ये त्या स्वतः दिसत असून, दुसरा फोटो ऑपरेशन थिएटरचा आहे. त्यामुळे त्यांच्यावर नेमकी कोणती शस्त्रक्रिया किंवा वैद्यकीय प्रक्रिया झाली आहे का? याबाबत सोशल मीडियावर विविध चर्चा रंगल्या आहेत. दरम्यान, लीना यांच्या या पोस्टनंतर चाहत्यांनी त्यांच्या प्रकृतीबद्दल चिंता व्यक्त केली असून, त्यांनी स्वतःची काळजी घ्यावी आणि लवकर बरे व्हावे, अशी प्रार्थना केली आहे. याशिवाय चाहते आता लीना भागवत यांच्या कमबॅकची आतुरतेने वाट पाहणार आहेत.
अभिनेत्री लीना भागवत यांची पोस्ट
मेरी आवाज ही पेहचान है….
आता पुढचे काही दिवस “कसं वाटलं नाटक?” असं म्हणता येणार नाही. हेच कशाला काहीच बोलता येणार नाही. गेले काही दिवस फक्त एकच गाणं आठवतंय मेरी आवाज ही पेहचान है…. एका कलाकारासाठी त्याचा आवाज हीच खरी त्याची ताकद असते. मागच्या वर्षीपासून आमने सामनेचे प्रयोग लागोपाठ housefull जातायत. प्रयोग बघताना जेवढी मजा तुम्हाला येते तेवढीच आम्ही कलाकार सुद्धा करतो.
आमने सामने मधल्या माझ्या पात्राला दिलेलं प्रेम मी कधीच विसरू शकणार नाही. पण गेले काही महिने आवाजावर ताण यायला सुरुवात झाली होती. डॉक्टरांच्या मार्गदर्शनाखाली प्रयोग करू लागले पण शेवटी डॉक्टरांनी सक्त ताकीद दिली… पेहचान टिकवायची असेल तर एक छोटी procedure करावीच लागेल. आणि अखेर काल ती procedure पार पडली.
डॉक्टर त्यांची संपूर्ण टीम, मंगेश, नाटकाची टीम पूर्ण वेळ माझ्या पाठीशी खंबीरपणे उभे राहिले. आता काही दिवस आवाजाला विश्रांती देतेय. थोड्या दिवसांनी अजून ताकदीने उभी राहीन आणि पुन्हा म्हणेन “कसं वाटलं नाटक?”… तोपर्यंत एक छोटासा मध्यांतर… लवकरच भेटू आमने सामने!
