Plane incident : दुबईहून तेल अवीवला जाणाऱ्या फ्लायदुबईच्या FZ1073 विमानात बुधवारी धक्कादायक प्रकार घडला. विमानाच्या कॉकपिटमध्ये ओमानच्या को-पायलटने भारतीय कॅप्टन स्मित मछार यांच्यावर चाकूने हल्ला केला. त्यानंतर विमानाचे नियंत्रण धोक्यात आले. मात्र, जखमी असूनही कॅप्टन मछार यांनी परिस्थिती हाताळत विमानाला अपघातापासून वाचवले. या विमानात 174 प्रवासी आणि विमान कर्मचारी होते.

विमानाने आपत्कालीन संदेश पाठवल्यानंतर त्याला सौदी अरेबियातील तबुक विमानतळाकडे वळवण्यात आले. विमानाची तेथे सुरक्षितपणे आपत्कालीन लँडिंग करण्यात आली. या घटनेत दोन्ही पायलट जखमी झाले असून त्यांना रुग्णालयात दाखल करण्यात आले आहे. फ्लायदुबईने विमानातील सर्व प्रवासी सुरक्षित असल्याचे सांगितले आहे.

कोण आहेत कॅप्टन स्मित मछार?

स्मित मछार हे गुजरातचे रहिवासी असून ते अनुभवी वैमानिक आहेत. त्यांच्या लिंक्डइन प्रोफाइलनुसार, त्यांना बोईंग 737 विमानांच्या ताफ्यावर 13 वर्षांहून अधिक काळ व्यावसायिक विमान उड्डाणाचा अनुभव आहे. यापूर्वी त्यांनी स्पाइसजेटमध्ये पायलट म्हणून काम केले आहे. 2011 ते 2022 या काळात ते स्पाइसजेटमध्ये कार्यरत होते. जून 2022 मध्ये त्यांनी फ्लायदुबईमध्ये ‘डायरेक्ट एंट्री कॅप्टन’ म्हणून प्रवेश केला.

प्रवाशांनीही केली मदत –

इस्रायली माध्यमांच्या वृत्तानुसार, कॉकपिटमध्ये कॅप्टन मछार आणि को-पायलटमध्ये झटापट झाली. कॅप्टन मछार यांनी हल्लेखोराचा सामना केला. त्यानंतर काही इस्रायली प्रवाशांनीही कॉकपिटमध्ये जाऊन को-पायलटला नियंत्रणात आणण्यास मदत केली.

इस्रायलचे पंतप्रधान बेंजामिन नेतन्याहू यांनी हल्ला करणाऱ्या को-पायलटला अटक झाल्याचे सांगितले. सौदी अधिकारी त्याची चौकशी करत आहेत.

विमान वेगाने खाली आले –

फ्लाइटमध्ये 27 मुलांसह 174 प्रवासी होते, अशी माहिती ‘ynet’ने दिली आहे. फ्लाइटरडार24च्या माहितीनुसार, विमान सुमारे 33 हजार फूट उंचीवरून अवघ्या एका मिनिटात 17 हजार फुटांपर्यंत खाली आले. विमानाने आपत्कालीन संदेश दिल्यानंतर तबुककडे वळवण्यात आले.

या घटनेदरम्यान विमानात घबराट निर्माण झाली होती. काही प्रवाशांनी कॉकपिटजवळ आरडाओरड आणि झटापटीचे आवाज ऐकल्याचे सांगितले. घटनेचा तपास सुरू असून हल्ल्यामागील कारण अद्याप स्पष्ट झालेले नाही.