चिंबळी : लाडक्या गणरायाच्या आगमनामुळे संपूर्ण महाराष्ट्रात उत्साहाचे वातावरण असतानाच, बाजारपेठेतही मोठी आर्थिक उलाढाल पाहायला मिळत आहे. गणेशोत्सवाच्या सजावटीसाठी आणि पूजेसाठी फुलांची मागणी प्रचंड वाढल्याने सर्वच प्रकारच्या फुलांचे दर कमालीचे तेजीत आले आहेत. घाऊक आणि किरकोळ बाजारात फुलांचे भाव गगनाला भिडले असून, गुलछडी आणि शेवंतीच्या दरात थेट दुपटीने वाढ झाली आहे.

गेल्या काही दिवसांपूर्वी मंदीत असलेल्या फूल बाजाराला गणेशोत्सवामुळे अचानक मोठा बहर आला आहे. सार्वजनिक गणेशोत्सव मंडळांचे भव्य मंडप, देखावे, रथ सजावट तसेच घरगुती गणपतींच्या स्वागतासाठी झेंडू आणि शेवंतीला सर्वाधिक मागणी आहे. मुख्य बाजारपेठांमध्ये आवक भरपूर होत असली, तरी ग्राहकांची गर्दी आणि मागणी त्याहून अधिक असल्याने भावात २० ते ३० टक्क्यांपासून १०० टक्क्यांपर्यंत (दुपटीने) वाढ झाली आहे.

सजावटीसाठी सर्वाधिक वापरल्या जाणाऱ्या पिवळ्या-केशरी झेंडू आणि कर्नाटकातून येणाऱ्या मारिगोल्ड शेवंतीचे भाव चांगलेच वधारले आहेत. सुवासिक आणि आकर्षक सजावटीसाठी लागणाऱ्या गुलछडीचे दर थेट दुप्पट झाले असून, गुलाबाच्या फुलांनाही मोठी मागणी आहे. बाप्पाला प्रिय असलेल्या जास्वंद, मोगरा, दूर्वा, कमळ आणि विड्याच्या पानांच्या किमतीतही वाढ झाली आहे. सध्या किरकोळ बाजारात दूर्वांची गड्डी २५ रुपये तर कमळाचे फूल २० ते २५ झेंडू १०० ते १५० अष्टर २०० शेवंती १०० ते २०० रू भाव मिळत आहे.