प्रभात वृत्तसेवा
पुणे : महापालिका निवडणुकीसाठीची प्रभाग रचना अंतीम झाल्यानंतर तिकिटासाठी तीव्र चढाओढ असलेल्या इच्छुकांचे प्रभागाच्या आरक्षणाकडे लक्ष लागले आहे. या आरक्षण सोडतीची तारीख अखेर जाहीर झाली असून आता ११ नोव्हेंबर २०२५ रोजी ही सोडत काढली जाणार आहे.महापालिकेच्या स्वारगेट येथील गणेश कला क्रीडा मंच येथे ही सोडत काढली जाणार आहे. त्यासाठीचे वेळापत्रक राज्य निवडणूक आयोगाने सोमवारी जाहीर केले. या सोडतीमुळे इच्छुकांना आपल्याला उमेदवारी मिळणार की दुसऱ्या प्रभागात लढावे लागणार हे स्पष्ट होणार आहे.

महापालिकेची अंतीम प्रभाग रचना ४ ऑक्टोबर रोजी जाहीर झाली. त्यानंतर आरक्षण सोडत निघणे अपेक्षित होते. मात्र, निवडणूक आयोगाकडून आरक्षण सोडतीच्या आधीच प्रभाग निहाय आणि मतदान केंद्रनिहाय मतदार यादी अंतीम करण्याचे वेळापत्रक जाहीर केले गेले. त्यानुसार, प्रशासनाकडून ते काम सुरू असतानाच आता प्रभाग निहाय आरक्षणाच्या सोडतीचे वेळापत्रक जाहीर झाले. यामुळे निवडणूक प्रक्रियेला आणखी वेग येणार आहे. या वेळापत्रकानुसार ही प्रक्रिया ३० ऑक्टोबर ते २ डिसेंबर २०२५ या कालावधीत पूर्ण केली जाणार आहे.

त्यात अनुसूचित जाती, जमाती आणि नागरिकांचा इतर मागासवर्गीय प्रवर्ग (ओबीसी) प्रभाग निश्चित केले जाणार आहे. आरक्षणाच्या सोडतीनंतर कोण कोणत्या प्रभागातून निवडणूक लढवणार?, घरातील पुरुष निवडणूक लढवणार की महिला निवडणूक लढवणार? हे चित्र स्पष्ट होते. त्यामुळे ही सोडत इच्छुक उमेदवारांसाठी सर्वात महत्वाची समजली जाते. या शिवाय, हे आरक्षण कसे निश्चित करावे यासाठी शासनाकडून गेल्या आठवड्यात महापालिकेसाठी नियमावली जाहीर केली आहे.

असे आहे वेळापत्रक
-आरक्षित जागांची संख्या निश्चित करून त्यास राज्य निवडणूक आयोगाची मान्यता घेण्यास प्रस्ताव सादर करणे – ३० ऑक्टोबर ते ४ नोव्हेंबर
– आरक्षण सोडतीची सूचना जाहीर करणे – ८ नोव्हेंबर
– आरक्षण सोडत काढून सोडतीचा निकाल राज्य निवडणूक आयोगास सादर करणे – ११ नोव्हेंबर
– प्रारूप आरक्षण हरकती व सूचनांसाठी जाहीर करणे – १७ नोव्हेंबर
– हरकती सूचना मागविण्याचा अंतिम दिनांक – २४ नोव्हेंबर
– हरकती-सूचनांवर विचार करून पालिका आयुक्तांनी निर्णय घेणे – २५ नोव्हेंबर ते १ डिसेंबर
– आयोगाच्या मान्यतेनंतर अंतिम आरक्षण राजपत्रात जाहीर करणे – २ डिसेंबर २०२५