विभागीय आयुक्तांनी घेतली बैठक

पुणे – करोना बाधितांची संख्या जशी वाढत चालली आहे तशी गंभीर रुग्णांची संख्याही वाढत चालली आहे. त्यातून व्हेंटिलेटर आणि ऑक्‍सिजन बेडचा तुटवडा निर्माण होत असून, बेड वाढवण्याबाबत विभागीय आयुक्तांनी गुरूवारी बैठक घेतली. गेल्या दोन दिवसांपासून शहरातील रुग्णालयांत केवळ एकच व्हेंटिलेटर उपलब्ध असल्याचे दाखवत आहे.

शहरात सध्या बाधितांसाठी सरकारी आणि खासगी रुग्णालयांत मिळून 362 आयसीयु बेड तर 469 व्हेंटिलेटर बेड उपलब्ध आहेत. मात्र यापैकी आयसीयुचे 4 तर व्हेंटिलेटरचा केवळ एकच बेड उपलब्ध असल्याचे विभागीय आयुक्तांच्या डॅशबोर्डवर दाखवत आहे.

गुरूवारी शहरात 825 रुग्ण गंभीर रुग्णांची नोंद झाली आहे, त्यातील काहीजणांना अतिदक्षता विभागात व्हेंटिलेटरवर ठेवण्यात आले आहे. तर ऑक्‍सिजनवर असणाऱ्या रुग्णांची संख्या तीन हजारांच्या पुढे गेली आहे. गुरूवारी 3 हजार 403 ऑक्‍सिजनवर असणाऱ्या रुग्णांची नोंद झाली.

बेड वाढवण्याबाबत बैठक…
बेडची संख्या वाढवण्याबाबत गुरूवारी विभागीय आयुक्त सौरभ राव यांनी तातडीची बैठक घेतली. या बैठकीला पुणे शहर आणि पिंपरी चिंचवड येथील वरिष्ठ आरोग्य अधिकारी उपस्थित होते. तसेच खासगी रुग्णालयांमधील अधिकारीही उपस्थित होते. त्यामध्ये पुणे शहर, पिंपरी चिंचवड येथील खासगी रुग्णालयांत बेड वाढवण्याबाबत चर्चा झाली. खासगी रुग्णालयांमध्ये 80 टक्के बेड कोविडच्या रुग्णांसाठी अधिग्रहित करण्याबाबत चर्चा झाली. त्यानुसार येत्या दोन दिवसांत आणखी 600 बेड उपलब्ध होतील. तसेच व्हेंटिलेटरचे 25 तर आयसीयुसाठी 50 बेड उपलब्ध होण्याची शक्‍यता आहे.