Vikram Gaikwad passed away: सिनेसृष्टीतून अतिशय दुःखद बातमी समोर आली आहे. सुप्रसिद्ध मेकअप आर्टिस्ट विक्रम गायकवाड यांचे निधन झाले आहे. त्यांच्या अकाली निधनाने सिनेसृष्टीतून शोक व्यक्त केला जात आहे. गायकवाड यांनी अनेक चित्रपटांसाठी मेकअप आर्टिस्ट म्हणून काम केले आहे. त्यांच्या निधनाच्या वृत्ताने कलकारांना धक्का बसला आहे. आज दुपारी  4.30 वाजता दादरच्या शिवाजी पार्क स्मशान भूमीत त्यांच्यावर अत्यंसंस्कार करण्यात येणार आहे.

विक्रम गायकवाड यांची सिनेसृष्टीतील एक उत्तम मेकअप आर्टिस्ट म्हणून ख्याती होती. त्यांनी अनेक हिंदी सिनेमा, मराठी सिनेमा, मराठी नाटक तर काही बंगाली सिनेमांसाठी मेकअप आर्टिस्ट म्हणून काम केले आहे. काशीनाथ घाणेकर, बालगंधर्व, ठग्ज अॅाफ हिंदुस्तान, शहीत भगतसिंग आणि जाणता राजा या नाटकातील पात्रांचे मेकअप त्यांनी केले आहे. त्यांनी पात्रांना केलेली रंगभूषा अधिक वास्तववादी होती. यासोबतच त्यांची एक अभिनेता म्हणूनही ओळख होती.

हिंदी सिनेसृष्टीत अत्यंत गाजलेल्या आणि लोकांच्या पसंतीस उतरलेल्या अनेक मोठ्या सिनेमासांठी विक्रम गायकवाड यांनी मेकअप आर्टिस्ट म्हणून काम केले आहे. पानिपत, बेल बॉटम ,उरी, डर्टी ब्लॅकमेल , दंगल , पीके, झांशी, सुपर 30, केदारनाथ अशा अनेक सिनेमात त्यांनी रंगभूषाकार म्हणून काम पाहिले आहे. याशिवाय पावनखिंड, फत्ते शिकस्त, शेर शिवराज अशा ऐतिहासिक मराठी सिनेमांसाठीही त्यांनी मेकअप आर्टिस्ट म्हणून यशस्वी जबाबदारी पेलली आहे. त्यांना सात वेळा राष्ट्रीय पुरस्काराने गौरवण्यात आले आहे. तसेच काही बंगाली सिनेमांसाठी त्यांनी रंगभूषाकार म्हणून काम केले आहे.