Sameera Reddy : प्रसिद्ध अभिनेत्रीला होती बोबडेपणाची समस्या; धाडसाने केली मात, सांगितला ‘तो’ कठीण काळ
Sameera Reddy : बॅालिवूड अभिनेत्री समीरा रेड्डी हिला बोबडेपणाची समस्या होती. लहान असताना तिला या गोष्टीचा नाहक त्रास सहन करावा लागला होता.
Sameera Reddy : अभिनेत्री समीरा रेड्डीने बॅालिवूडमधील अनेक चित्रपटांमध्ये काम केले आहे. तिचे काही चित्रपट हिटही झाले आहेत. प्रेक्षकांना तिने आपल्या अभिनयाची दखल घ्यायला लावली. सध्याच्या घडीला बॅालिवूडमध्ये ती सक्रिय नाही.
समीरा विविध मुद्यांवर आपले मत व्यक्त करत असते. नुकत्याच दिलेल्या एका मुलाखतीत तिने मोठा खुलासा केला आहे. तिला असा एक आजार होता, ज्यामुळे तिला खूप मानसिक त्रास सहन करावा लागला.
अभिनेत्रीने खुलासा केला आहे की, लहानपणी तिच्या तोतरेपणामुळे तिला अनेकदा अपमानित केले जायचे आणि तिची चेष्टा उडवली जायची. त्यामुळे तिला मानसिक त्रास सहन करावा लागायचा. आपला आत्मविश्वास परत मिळवण्यासाठी तिला अनेक वर्षे थेरपी घ्यावी लागली.
अभिनेत्री समीरा रेड्डी तिच्या स्पष्टवक्तेपणासाठी ओळखली जाते. प्रसूतीनंतर वाढणारे वजन, आई होण्यातील आव्हाने किंवा नैराश्याची समस्या. ती प्रत्येक विषयावर आपले मत उघडपणे मांडते.
नेमकं काय म्हणाली समीरा?
“मी लहानपणापासूनच बोबडी होती आणि त्यामुळे मला त्रास दिला जायचा. माझा आत्मविश्वास परत मिळवण्यासाठी मला अनेक वर्षे थेरपी घ्यावी लागली. आजही, जर मी अडखळत बोलले आणि कोणी त्यावर प्रतिक्रिया दिली, तर मला अजूनही वाईट वाटते. लहानपणी लावलेले शिक्के खूप खोलवर परिणाम करू शकतात. हे शिक्के, जरी ते निरुपद्रवी असले तरी, मुलाच्या आत्मविश्वासावर नकळतपणे परिणाम करू शकतात.”
मुलांना वारंवार ‘मंदबुद्धी’ किंवा ‘कमजोर’ म्हटले गेल्याने त्यांच्या मनात आंतरिक शंका निर्माण होऊ शकतात. यामुळे ते शैक्षणिक आणि सामाजिकदृष्ट्या प्रयत्न करण्यास किंवा जोखीम पत्करण्यास कचरतात. जेव्हा एखाद्या मुलाला वारंवार ‘कमजोर’ किंवा ‘मूर्ख’ म्हटले जाते, तेव्हा ते त्यावर विश्वास ठेवू लागतात. हा विश्वास हळूहळू त्यांच्या आत्मसन्मानाला आकार देतो आणि ते प्रयत्न करणे पूर्णपणे सोडून देतात.
आपल्या मुलांबद्दल बोलताना समीरा रेड्डी म्हणाली, “मी माझ्या मुलांना माझ्याशी बोलायला सांगते. एकाच क्षेत्रात संघर्ष करणे ही तुमची ओळख नाही, हे समजून घ्या. त्याबदल्यात कधीही कोणाला कमी लेखू नका.”
जेव्हा मुलांना प्रोत्साहन, मार्गदर्शन आणि त्यांच्या गतीने शिकण्याची संधी मिळते, तेव्हा त्यांचा आत्मविश्वास वाढतो, असेही तिने सांगितले. समीराने तिच्या लोकप्रिय ‘मेसी मामा’ कंटेंटमुळे सोशल मीडियावर एक विशेष ओळख मिळवली आहे. तिला एक मुलगा आणि एक मुलगी अशी दोन मुले आहेत.
