Fake Currency – पाचशेच्या बनावट नोटा खपवण्याचा प्रयत्न करणाऱ्या दोघांना नागरिकांनी पकडून पोलिसांच्या ताब्यात दिले आहे. ओमप्रकाश महावीर अगरवाल (३२, रा. टिंगरेनगर, विश्रांतवाडी) आणि मौसम नरेंद्र मिश्रा (३६, रा. वडगाव शिंदे रोड, लोहगाव) यांना पोलिसांनी ताब्यात घेतले असून सिद्धराम अशोक बिदनकर (२५) यांनी कोरेगाव पार्क पोलीस ठाण्यात फिर्याद दिली आहे. दोघांविरूद्ध फसवणूक व बनावट चलन वापरल्याप्रकरणी गुन्हा दाखल केला आहे.

पोलिसांच्या माहितीनुसार रुबी हॉल क्लिनिकच्या एक्झिट गेटजवळच्या चहाच्या टपरीवर बनावट नोट देऊन सिगारेट खरेदी करण्याचा दोघांनी प्रयत्न केला. सिद्धराम, त्याचा जुळा भाऊ शिवा हे पाच वर्षांपासून सिनेमॅटोग्राफर म्हणून काम करतात. त्यांची आई रुबी हॉलजवळ चहाची टपरी चालवते. शुक्रवारी (१९ जून) दुपारी सुमारे तीनला दोघे भाऊ आईच्या मदतीसाठी टपरीवर थांबले होते. यावेळी दुचाकीवरून दोघे टपरीवर आले. यातील एकाच्या डाव्या हाताला फ्रॅक्चर होते. त्याने ५०० रुपयांची नोट देऊन सिगारेटची मागणी केली. त्यांच्या आईने नोट स्वीकारून सिगारेट व उर्वरित रक्कम परत केली.

त्यानंतर चहापत्ती आणण्यासाठी आईने तीच ५०० रुपयांची नोट सिद्धरामला दिली. नोट हातात आल्यावर वजन कमी असल्याचा संशय आला. त्यांनी नोट तपासली असता तिचा हिरवा रंग पसरलेला दिसला. तसेच नोटेवरील अक्षरे धुसर वाटली. भावाकडील ५०० रुपयांच्या नोटेशी तुलना केली असता कागद व छपाईमध्ये फरक दिसल्याने नोट बनावट असल्याची खात्री झाली. दोघा भावांनी संशयितांचा शोध घेतला असता ते जवळच्या दुकानात ५०० रुपयांची नोट देऊन सिगारेट खरेदी करण्याचा प्रयत्न करत होते. दोघांनी नागरिकांच्या मदतीने संशयितांना पकडून तातडीने डायल ११२ वर संपर्क साधला. पोलिसांनी दोघांना ताब्यात घेत ताडीवाला कोरेगाव पार्क पोलीस ठाण्यात आणले.