Fact Check Mamata Banerjee Name: लोकसभा निवडणुकीच्या दुसऱ्या टप्प्यासाठी आज मतदान होत आहे. आज 13 राज्यांमध्ये 88 जागांवर मतदान होत आहे. दरम्यान, लोकसभेच्या इतर जागांवर राजकीय पक्ष आपापल्या उमेदवारांच्या प्रचारात व्यस्त आहेत. दरम्यान, सोशल मीडियावर एक पेपर कटिंग व्हायरल होत आहे, ज्यामध्ये पश्चिम बंगालच्या ममता बॅनर्जी यांचे खरे नाव ‘मुमताज मसामा खातून’ असल्याचा दावा केला जात आहे. मात्र सत्यता पडताळणीत हा दावा खोटा असल्याचे आढळून आले आहे. काय दावा केला होता ? राजेश भारद्वाज नावाच्या युजरने सोशल मीडिया फेसबुकवर एक पोस्ट शेअर केली आहे, ज्यामध्ये पेपरचे हेडिंग आहे, ‘ममता बॅनर्जी यांचे खरे नाव क्वचितच काही जणांना माहिती असेल.’ आणि खाली त्यांचे नाव खरे नाव ‘मुमताज मसामा खातून’ असल्याचा दावा केला आहे. तपासात काय समोर आले ? सत्यता पडताळणीत ममता बॅनर्जी यांचे खरे नाव ‘मुमताज मसामा खातून’ असल्याचे सिद्ध करण्यासाठी ठोस काहीही सापडले नाही. दरम्यान, गोव्यातील एका सभेत ममता बॅनर्जी यांनी स्वतः ब्राह्मण असल्याचा दावा केला होता. त्याचा अहवाल हिंदुस्तान टाईम्ससह अनेक संकेतस्थळांवर प्रसिद्ध झाला. 14 डिसेंबर 2021 रोजीच्या हिंदुस्तान टाईम्सच्या अहवालात ममता बॅनर्जी यांनी भारतीय जनता पक्षावर (भाजप) प्रत्युत्तर देत म्हटले होते की, “मी ब्राह्मण आहे आणि मला भाजपकडून चारित्र्य प्रमाणपत्र घेण्याची गरज नाही.” निवडणूक आयोगाच्या वेबसाइटवर जाऊन ममता बॅनर्जी यांचे निवडणूक प्रतिज्ञापत्र शोधले. प्रतिज्ञापत्रात त्यांनी आपले नाव “ममता बॅनर्जी” आणि वडिलांचे नाव प्रोमिलेश्वर बॅनर्जी असे नमूद केले आहे. ममता बॅनर्जी पश्चिम बंगालच्या भवानीपूर विधानसभा मतदारसंघाच्या आमदार आहेत आणि त्यांनी 2021 च्या विधानसभा निवडणुकीत या जागेवरून उमेदवारी अर्ज (फॉर्म 2B) दाखल केला होता. दुसऱ्या टप्प्यात आज 26 एप्रिल रोजी पश्चिम बंगालमधील दार्जिलिंग, रायगंज आणि बालूरघाट या लोकसभेच्या एकूण तीन जागांवर मतदान होत आहे. निष्कर्ष काय ? मुख्यमंत्री ममता बॅनर्जी यांचे खरे नाव “मुमताज मसामा खातून” असल्याचा सोशल मीडियावर व्हायरल होत असलेला दावा तथ्य तपासणीत पूर्णपणे खोटा असल्याचे आढळून आले आहे.
