Extortion Case – कोरेगाव भीमा (ता. शिरूर) येथील एका प्रिंटिंग व्यावसायिकाला व्यवसाय चालवण्यासाठी दरमहा २० हजार रुपये खंडणीची मागणी करत जीवे मारण्याची धमकी दिल्याचा धक्कादायक प्रकार समोर आला आहे. या प्रकरणी शिक्रापूर पोलिसात डिंग्रजवाडी येथील अभिषेक रवींद्र गव्हाणे याच्या विरुद्ध गुन्हा दाखल करण्यात आला आहे. वारंवार फोन करून दमदाटी केल्याने आणि जीवितास धोका निर्माण झाल्याने व्यावसायिकाने पोलिसांत धाव घेतली आहे. कोरेगाव भीमा येथील व्यावसायिक समीर पांडुरंग ढेरंगे (वय ३९) यांचा प्रिंटिंगचा व्यवसाय आहे. संशयित आरोपी अभिषेक गव्हाणे याने ढेरंगे यांना वेगवेगळ्या मोबाइल नंबरवरून फोन करून, कोरेगाव भीमा परिसरात व्यवसाय सुरू ठेवायचा असेल तर दरमहा २० हजार रुपये द्यावे लागतील, अशी मागणी केली. ढेरंगे यांनी या मागणीला प्रतिसाद न दिल्याने संतापलेल्या अभिषेकने त्यांना शिवीगाळ करत, पैसे न दिल्यास समीर यांसह त्यांच्या कुटुंबीयांना गोळ्या घालून ठार मारण्याची धमकी दिली. या प्रकरणी समीर ढेरंगे यांनी दिलेल्या फिर्यादीवरून पोलिसांनी खंडणीचा गुन्हा दाखल केला असून पोलीस उपनिरीक्षक विजय मस्कर पुढील तपास करत आहेत. सणसवाडीच्या व्यक्तीकडून तळेगावात शिक्रापूर पोलीस ठाणे अंतर्गत गेल्या काही दिवसांत खंडणीच्या घटनांमध्ये वाढ झाली आहे. चार दिवसांपूर्वी तळेगाव ढमढेरे येथील एका माजी सैनिकाची जमीन बळकावण्याचा प्रयत्न करत खंडणी उकळल्याप्रकरणी सणसवाडी येथील विजयकुमार दरेकरवर गुन्हा दाखल झाला होता. त्यापूर्वीही कोरेगाव भीमामध्ये एका ठेकेदाराला खंडणी मागितल्याचा प्रकार घडला होता. आता पुन्हा एका व्यावसायिकाला धमकी मिळाल्याने परिसरातील खंडणीखोरांच्या वाढत्या सुळसुळाटाबाबत नागरिकांमध्ये भीती आणि संतापाचे वातावरण निर्माण झाले आहे.
