नसरापूर : देशाच्या रक्षणासाठी प्राणपणाला लावणाऱ्या सैनिकांचा सन्मान आणि रक्षाबंधनाचा उत्सव नसरापूर येथे उत्साहात साजरा झाला. तनिष्का व्यासपीठाच्या वतीने विठ्ठल-रुख्मिणी मंदिर सभागृहात आयोजित या सोहळ्यात आजी-माजी सैनिकांना राखी बांधून गौरविण्यात आले. कार्यक्रमास भोरचे माजी सभापती लहुनाना शेलार, उपसरपंच नामदेव चव्हाण, गणेश दळवी, सुशील विभुते, वैशाली झोरे यांच्यासह अनेक मान्यवर उपस्थित होते.

अनिल शेटे, विलास शेटे, भानुदास शेटे, सुनील राऊत, प्रवीण जगताप यांच्यासह अनेक सैनिकांना स्मृतीचिन्ह देऊन सत्कारण्यात आले. तनिष्का सदस्य आणि ग्रामस्थ महिलांनी सैनिकांना राख्या बांधून समाजातील महिलांच्या सुरक्षेसाठी तत्पर राहण्याची भावनिक विनंती केली. माजी सैनिक अनिल शेटे यांनी तरुणांनी देशसेवेसाठी सैन्यात सामील होण्याचे आवाहन केले. सुशील विभुते यांनी प्रत्येक नागरिकाने आपल्या क्षेत्रात प्रामाणिकपणे काम करून राष्ट्रनिर्मितीत योगदान द्यावे, असे सांगितले.

कार्यक्रमाचे प्रास्ताविक वैशाली झोरे यांनी केले, सूत्रसंचालन नीता शेटे यांनी, तर आभार प्रदर्शन चांदभाभी शेख यांनी केले. सुमन घाटे, उमा राशीनकर, स्मिता विभुते यांच्यासह अनेकांनी आयोजनात सहभाग घेतला. रक्षाबंधनाच्या या सोहळ्याने नात्यांचा आणि संरक्षणाच्या वचनाचा उत्सव साजरा करत नसरापूरमध्ये देशभक्ती आणि बंधुभावाची भावना दृढ केली.