Exam Paper Leaked : एकीकडे देशाची राजधानी दिल्लीतील जंतर-मंतरवर पेपरफुटीच्या (Exam Paper Leaked) घटनांविरोधात विद्यार्थ्यांचे तीव्र आंदोलन सुरू असतानाच, आता उत्तराखंडमधून एक अत्यंत धक्कादायक बातमी समोर आली आहे.

उत्तराखंड तांत्रिक विद्यापीठाचे अभियांत्रिकी शाखेचे दोन पेपर फुटल्याचे उघडकीस आले असून, या घटनेनंतर विद्यापीठ प्रशासनाने तातडीने कारवाई करत दोन्ही विषयांच्या परीक्षा रद्द केल्या आहेत.

या संपूर्ण प्रकरणाच्या चौकशीदरम्यान शिवालिक कॉलेजमधील प्राध्यापक आशीष कुमार यांचे नाव समोर आले आहे. प्राध्यापक आशीष कुमार हे विद्यापीठाच्या प्रश्नपत्रिका (Exam Paper Leaked) तयार करणाऱ्या समितीचे सदस्य होते.

परीक्षा होण्यापूर्वीच त्यांनी एका विशिष्ट महाविद्यालयाच्या व्हॉट्सअ‍ॅप ग्रुपवर परीक्षेतील प्रश्नांशी तंतोतंत जुळणारे प्रश्न विद्यार्थ्यांना पाठवल्याचा गंभीर आरोप त्यांच्यावर आहे. हा गैरप्रकार निदर्शनास आल्यानंतर विद्यापीठाने तातडीने उच्चस्तरीय चौकशी (Exam Paper Leaked) सुरू केली आहे.

७ वर्षांची बंदी अन् एफआयआर दाखल करण्याचे आदेश
‘वीर माधो सिंह भंडारी उत्तराखंड तांत्रिक विद्यापीठा’च्या कुलगुरू तृप्ता ठाकूर यांनी या प्रकरणी अत्यंत कडक भूमिका घेतली आहे. त्या म्हणाल्या, “संबंधित शिक्षकाने आपल्या २२ विद्यार्थ्यांच्या भवितव्याशी उघडपणे खेळ केला आहे.

अशा शिक्षकांना भविष्यात विद्यापीठाच्या कोणत्याही शैक्षणिक किंवा परीक्षा प्रक्रियेशी जोडू नये, ही आमची नैतिक जबाबदारी आहे. त्यामुळे विद्यापीठाने आशीष कुमार यांच्यावर पुढील सात वर्षांसाठी कोणत्याही परीक्षा प्रक्रियेत सहभागी होण्यास पूर्ण बंदी घातली आहे.”

कुलगुरू तृप्ता ठाकूर यांनी पुढे सांगितले की, संबंधित महाविद्यालयाने या आरोपी शिक्षकाविरुद्ध कडक पोलीस तक्रार दाखल केली पाहिजे. महाविद्यालयाने आतापर्यंत केलेल्या कारवाईवर विद्यापीठ प्रशासन अजिबात समाधानी नाही.

एक नव्हे, तर दोन पेपर फुटल्याचे उघड; ऑगस्टमध्ये होणार परीक्षा
प्रारंभिक चौकशीत केवळ एकाच विषयाची प्रश्नपत्रिका फुटल्याचे समोर आले होते. मात्र, सखोल चौकशीदरम्यान दुसराही पेपर आधीच फुटल्याचे स्पष्ट झाले. त्यामुळे प्रशासनाने दोन्ही विषयांच्या परीक्षा रद्द करण्याचा निर्णय घेतला.

रद्द करण्यात आलेल्या या दोन्ही परीक्षा (Exam Paper Leaked) आता ऑगस्ट महिन्यात पुन्हा घेतल्या जाणार असून, त्यांच्या नवीन तारखा विद्यापीठाकडून लवकरच जाहीर केल्या जातील. देशभर पेपरफुटीविरोधात रोष व्यक्त केला जात असतानाच उत्तराखंड तांत्रिक विद्यापीठात घडलेल्या या प्रकारामुळे शैक्षणिक वर्तुळात मोठी खळबळ उडाली आहे.