Sangeetha Davane : कालचा दिवस राज्यातील महापालिका क्षेत्रातील सर्वच ठिकाणी नाट्यमय घडामोडी घडवणारा ठरला. महापालिका निवडणुकीसाठी उमेदवारी अर्ज दाखल करण्याचा शेवटचा दिवस असल्याने अर्ज दाखल करण्यासाठी लगभग पाहायला मिळाली. पण ठाणे महापालिका निवडणुकीसाठी एक महिला उमेदवार चक्क रुग्णावाहिकेतून अर्ज भरण्यासाठी कार्यालयात दाखल झाल्या होत्या. हे दृश्य पाहून सगळ्यांनाच धक्का बसला. नेमकं या महिलेसोबत असे काय घडले होते की त्यांना रुग्णावाहिकेतून अर्ज भरण्यासाठी यावे लागले. रुग्णवाहिकेतून अर्ज दाखल करण्यासाठी आलेल्या महिला उमेदवाराचे नाव संगीता दवणे आहे. त्यांनी राष्ट्रवादी काँग्रेस अजित पवार यांच्या पक्षाकडून उमेदवारी अर्ज दाखल केला आहे. ठाण्यातील प्रभाग क्रमांक २६ मधून त्या निवडणुकीच्या रिंगणात असणार आहे. नेमकं काय घडलं? संगीता दवणे सोमवारी सकाळी घरात जेवण बनवत असताना अचानक प्रेशर कुकरचा स्फोट झाला आणि त्या गंभीरपणे जखमी झाल्या. यानंतर त्यांना तात्काळ रुग्णालयात दाखल करण्यात आले होते. त्यांच्यावर रुग्णालयात उपचार सुरू होते. मात्र, ३० डिसेंबर उमेदवारी अर्ज दाखल करण्याचा शेवटचा दिवस असल्याने त्यांनी थेट रुग्णवाहिकेतून प्रभाग समिती कार्यालयात येऊन आपला उमेदवारी अर्ज भरला. त्यांच्या या धाडसी कामगिरीमुळे त्यांची उपस्थिती तसेच उमेदवारी अर्ज भरण्याची पद्धत सोशल मीडियावर चर्चेचा विषय ठरली आहे. संगीता दवणे यांची प्रभागात राष्ट्रवादी काँग्रेसची पकड मजबूत समजली जाते. राष्ट्रवादी काँग्रेस पक्षाच्या फुटीनंतर त्यांनी अजित पवार यांच्या राष्ट्रवादी काँग्रेस पक्षात राहणे पसंत केले. ठाणे महापालिका निवडणुकीत त्यांना राष्ट्रवादी काँग्रेस पक्षाकडून उमेदवारी देण्यात आली आहे. हेही वाचा : मायलेकी बसची वाट पाहत उभ्या होत्या अन्…; भांडुप अपघातात बालकलाकाराच्या आईचा डोळ्यादेखत दुर्देवी मृत्यू
