Dhadak 2: तृप्ती डिमरी आणि सिद्धांत चतुर्वेदी यांच्या प्रमुख भूमिका असलेल्या ‘धडक 2’ या चित्रपटाला बॉक्स ऑफिसवर अपेक्षित प्रतिसाद मिळत नाहीये. समीक्षकांकडून आणि काही प्रेक्षकांकडून चित्रपटाचं कौतुक केलं जात असलं तरी त्याचं बॉक्स ऑफिस कलेक्शन सातत्याने घसरताना दिसत आहे.

ही इंटेन्स रोमँटिक लव्ह स्टोरी १ ऑगस्ट २०२५ रोजी प्रदर्शित झाली. सुरुवातीच्या काही दिवसांमध्ये थोडीफार कमाई झाली असली तरी सहाव्या दिवशीच्या आकड्यांमुळे निर्मात्यांची चिंता वाढली आहे.

सहाव्या दिवशीचा कमाईचा आकडा चिंताजनक

एका रिपोर्टनुसार, ‘धडक 2’ ने सहाव्या दिवशी (बुधवार) फक्त 1 कोटी रुपये कमावले. हा चित्रपटाचा आतापर्यंतचा सर्वात कमी कलेक्शन असलेला दिवस ठरला आहे.

आतापर्यंतचे कलेक्शन:

पहिला दिवस (शुक्रवार): 3.5 कोटी

दुसरा दिवस (शनिवार): 3.75 कोटी

तिसरा दिवस (रविवार): 4.15 कोटी

चौथा दिवस (सोमवार): 1.35 कोटी

पाचवा दिवस (मंगळवार): 1.65 कोटी

सहावा दिवस (बुधवार): 1 कोटी

एकूण सहा दिवसांची कमाई: 15.40 कोटी रुपये

प्रेक्षकांसाठी ९९ रुपयांचं खास ऑफरही फेल

चित्रपटाच्या घसरत्या कलेक्शनमुळे निर्मात्यांनी ५ ऑगस्ट रोजी (मंगळवार) एक खास प्रमोशनल ऑफर सुरू केली होती. प्रेक्षकांना देशभरात फक्त ₹99 मध्ये ‘धडक 2’ पाहण्याची संधी देण्यात आली.

इंस्टाग्रामवर पोस्ट करत ही घोषणा करण्यात आली होती.
“आता प्रत्येक भावना अनुभवायला मिळेल! पाहा प्रेमाची ही आगळी वेगळी लढाई, फक्त ₹99 पासून सुरू.”
मात्र या ऑफरनंतरही कलेक्शनमध्ये फारसा फरक पडलेला नाही.

‘सैयारा’ आणि ‘सन ऑफ सरदार 2’ ने दिलं मोठं टक्कर

‘धडक 2’ ला रिलीज झाल्याच्या पहिल्याच दिवशी दोन मोठ्या चित्रपटांशी स्पर्धा करावी लागली.

1. ‘सन ऑफ सरदार 2’ (अजय देवगन) :
हास्य आणि कौटुंबिक ड्रामा असलेल्या या चित्रपटाने पहिल्या दिवसापासूनच चांगली कामगिरी केली. सहाव्या दिवशी याने 1.65 कोटी रुपयांची कमाई करत एकूण 31 कोटींचा टप्पा पार केला आहे.

2. ‘सैयारा’ (अहान पांडे आणि अनीत पड्डा) :
नवोदित कलाकार असूनही ‘सैयारा’ तिसऱ्या आठवड्यातदेखील धमाल करत आहे. या चित्रपटाने आतापर्यंत 300 कोटींच्या पुढे मजल मारली आहे. बुधवारीच याने आणखी 2 कोटी रुपये कमावले.

 

या दोन्ही चित्रपटांच्या तुलनेत ‘धडक 2’ मागे पडली असून, त्याचे कलेक्शन प्रेक्षकांची उत्सुकता निर्माण करण्यात अपयशी ठरत आहे.‘धडक 2’ ची कथा आणि अभिनय चांगले असूनही, चित्रपटाला बॉक्स ऑफिसवर फारसा फायदा झाला नाही. स्पर्धात्मक वातावरण, अपेक्षेपेक्षा कमी प्रसिद्धी आणि प्रेक्षकांचा ओढा इतर चित्रपटांकडे वळल्यामुळे ‘धडक 2’ फ्लॉप होण्याच्या मार्गावर आहे.

प्रेक्षकांच्या प्रतिक्रिया चांगल्या असल्या तरी आर्थिक यश न मिळाल्यास ‘धडक 2’ची नोंद एका अपयशी सिक्वेल म्हणून घेतली जाण्याची शक्यता आहे.आता पाहावं लागेल की येत्या शनिवार-रविवारी वीकेंडमध्ये हा चित्रपट काही चमत्कार करू शकतो का.