संगमनेर (प्रतिनिधी) – संपूर्ण देशातील सहकारासाठी मार्गदर्शक ठरलेल्या अमृत उद्योग समूहातील विविध सहकारी संस्थांमधील कर्मचाऱ्यांना सेवानिवृत्तीनंतरही एकमेकांच्या सुखदुःखात सहभागी होऊन हे नाते असेच कायम राहण्यासाठी कर्मचाऱ्यांच्या सुविधेसाठी स्वतंत्र कार्यालय सुरू करण्यात आले आहे. तालुका व अमृत उद्योग समूह हा एक परिवार असून, सेवानिवृत्तीनंतरही एकमेकांच्या सुखदुःखात सर्वजण सहभागी असणे ही कौतुकास्पद बाब असल्याचे प्रतिपादन आमदार बाळासाहेब थोरात यांनी केले.

सहकारमहर्षी भाऊसाहेब थोरात सहकारी साखर कारखान्याच्या कार्यस्थळावर अमृत उद्योग समूहातील सेवानिवृत्त कर्मचारी संघाचे कार्यालय सुरू करण्यात आले. यावेळी ते बोलत होते. याप्रसंगी कारखान्याचे चेअरमन बाबासाहेब ओहोळ, इंद्रजीत थोरात, डॉ.जयश्री थोरात, व्हा.चेअरमन संतोष हासे, कार्यकारी संचालक जगन्नाथ घुगरकर, सर्व संचालक, भास्कर पानसरे व विविध संस्थांमधील सेवानिवृत्त कर्मचारी मोठ्या संख्येने उपस्थित होते.

विविध सहकारी संस्थांमधून सेवानिवृत्त झाल्यानंतर अनेक कर्मचारी आपल्या गावी स्थायिक असतात. अशावेळी मुलांचे लग्नकार्य, आजारपण,घरगुती कार्यक्रम यामुळे जुने मित्र यांना भेटणे, समारंभांना निरोप देणे, सुखदुःखात सहभागी होऊ देणे अशा बाबतीत अनेकांना अडचणी येतात.

यामुळे सर्वांचा समन्वय व्हावा तसेच काही कर्मचाऱ्यांना आजारपणात मदत व्हावी, याकरिता हे कार्यालय नक्कीच काम करेल, असा विश्वास कार्यकारी संचालक जगन्नाथ घुगरकर यांनी व्यक्त केला. यावेळी विविध संस्थांमधील अनेक सेवानिवृत्त कर्मचारी उपस्थित होते. अनेकांनी बऱ्याच दिवसांनी भेटल्यानंतर हस्तांदोलन करत एकमेकांना गळा भेट दिली.