Satara: निरोप पोहचवूनही वरिष्ठांचा विषय बाजूला ठेवला शिवेंद्रसिंहराजे; आता निर्णय वरिष्ठ पातळीवर होतील
Satara जिल्हा बँकेत राष्ट्रवादी काँग्रेस आणि शिवसेनेने अध्यक्ष- उपाध्यक्षपद पटकावल्यानंतर शिवेंद्रसिंहराजे यांनी पत्रकारांशी संवाद साधला. सातारा आणि जावळी तालुक्यांत माझे साडेचारशे मतदान होते. त्यामुळे उमेदवारांना अडचणीत आणण्याचे प्रयत्न झाले. तरीही मुख्यमंत्र्यांच्या शब्दासाठी आम्ही आमच्या जागांचा त्याग केला. वरिष्ठांची भूमिका महायुतीतील घटक पक्षांच्या जिल्हास्तरीय नेत्यांपर्यंत सातत्याने पोहोचवली होती, असे त्यांनी स्पष्ट केले.

Satara: मध्यवर्ती सहकारी बँकेच्या अध्यक्ष-उपाध्यक्ष निवडीच्या दिवशी सकाळीही वरिष्ठांचा निरोप ग्रामविकास मंत्री मकरंद पाटील आणि पालकमंत्री शंभूराज देसाई यांच्यापर्यंत पोहोचवला होता. मात्र, काही गोष्टी आधीच ठरलेल्या असल्याचे सांगत वरिष्ठांचा विषय बाजूला ठेवण्यात आला. यासंदर्भात आता वरिष्ठ पातळीवर निर्णय होतील, असे सार्वजनिक बांधकाम मंत्री शिवेंद्रसिंहराजे भोसले यांनी सूचित केले.
जिल्हा बँकेत राष्ट्रवादी काँग्रेस आणि शिवसेनेने अध्यक्ष- उपाध्यक्षपद पटकावल्यानंतर शिवेंद्रसिंहराजे यांनी पत्रकारांशी संवाद साधला. सातारा आणि जावळी तालुक्यांत माझे साडेचारशे मतदान होते. त्यामुळे उमेदवारांना अडचणीत आणण्याचे प्रयत्न झाले. तरीही मुख्यमंत्र्यांच्या शब्दासाठी आम्ही आमच्या जागांचा त्याग केला. वरिष्ठांची भूमिका महायुतीतील घटक पक्षांच्या जिल्हास्तरीय नेत्यांपर्यंत सातत्याने पोहोचवली होती, असे त्यांनी स्पष्ट केले. जिल्हा बँकेच्या कारभारात काही चुकीच्या गोष्टी घडल्या असतील, तर संचालकांनी त्यावर जरूर आवाज उठवावा. मात्र, केवळ राजकीय कारणांसाठी जिल्हा बँकेचा वापर होणे योग्य नाही, अशी स्पष्ट भूमिका त्यांनी मांडली. जिल्हा परिषद सत्तेच्या राजकारणातही आम्ही आमच्या जागा निवडून आणल्या आणि पक्ष म्हणून पूर्ण ताकदीने उभे राहिलो, याची आठवण त्यांनी करून दिली.
‘आपण शांत राहून काम केले तर सगळे मिळते. मात्र, सातत्याने बोलत राहिलो तर काहीच मिळत नाही,’ असे विधान करत त्यांनी जयकुमार गोरे यांना अप्रत्यक्ष टोला लगावला. पक्षासाठी आणि देवेंद्र फडणवीस यांच्या अंतिम शब्दासाठी आम्ही काय करायचे, असे प्रश्न कधी विचारले नाहीत. मग निर्णय झाल्यानंतर त्याचे श्रेय घेण्यासाठी पुढे येणे आणि निर्णय मनासारखा झाला नाही तर ‘आम्ही नव्हतो, काय असेल ते शिवेंद्रसिंहराजेंना विचारा’, अशी भूमिका घेणे योग्य नाही, अशा शब्दांत त्यांनी आपली नाराजी व्यक्त केली. जयकुमार गोरे यांच्या हट्टासाठी काही जागांचा त्याग करुनही त्यांची नाराजी का, असा प्रश्न उपस्थित होताच, ‘त्यांची नाराजी का आहे, हे मला माहीत नाही. त्याचे उत्तर मी देऊ शकत नाही. त्यांनाच विचारा,’ असे त्यांनी सांगितले.
‘झालं तर आमच्यामुळे, नाही तर बाबाराजेंना विचारा’
जिल्हा बँकेच्या अध्यक्ष- उपाध्यक्ष निवडीवरून महायुतीअंतर्गत संघर्ष आता उघड झाला आहे. ग्रामविकास मंत्री जयकुमार गोरे यांनी जिल्हा बँकेच्या निवड प्रक्रियेतील घडामोडींवरून शिवेंद्रसिंहराजे भोसले यांच्याकडे बोट दाखवल्यानंतर शिवेंद्रसिंहराजे यांनीही जोरदार प्रत्युत्तर दिले. ‘झालं तर आमच्यामुळे आणि नाही झालं तर बाबाराजेंना विचारा, अशी भूमिका योग्य नाही. मुख्यमंत्री आणि भाजप हाच माझा अंतिम शब्द होता. मी कोणाशीही बैठक केली नाही, तडजोडही केली नाही,’ अशा स्पष्ट शब्दांत त्यांनी गोरेंच्या भूमिकेवर नाराजी व्यक्त केली. यावेळी जयकुमार गोरे यांनी निवड प्रक्रियेत आपण उपलब्ध नव्हतो, झालेल्या घडामोडींबाबत शिवेंद्रसिंहराजेंनाच विचारा, असे विधान केल्याच्या पार्श्वभूमीवर त्यांनी आपली भूमिका मांडली. जिल्हा बँकेच्या निवडणूक प्रक्रियेत प्रभारी म्हणून माझ्याकडे जबाबदारी असली, तरी प्रत्येक बैठकीला धैर्यशील कदम यांना सोबत घेऊन जात होतो. काही राजकीय घडामोडींचा अंदाज होता. मात्र, अध्यक्षपदाच्या निवड प्रक्रियेत मी कोणाशीही स्वतंत्र बैठक केली नाही किंवा कोणतीही तडजोड केली नाही. मुख्यमंत्री आणि भाजपचा निर्णय हाच माझ्यासाठी अंतिम शब्द होता, असे शिवेंद्रसिंहराजे यांनी नमूद केले.





