Dipali sayyad | Sushant Shelar : नाशिकमधील कथित भोंदू बाबा अशोक खरात प्रकरणाने राज्यभरात मोठी खळबळ उडवून दिली होती. आता याच बहुचर्चित प्रकरणावर आधारित चित्रपट प्रेक्षकांच्या भेटीला येणार असून, चित्रपटाची घोषणा होताच नव्या वादाला तोंड फुटले आहे.

या चित्रपटात महत्त्वाची भूमिका साकारणाऱ्या अभिनेत्री तथा शिवसेना नेत्या ‘दीपाली सय्यद’ यांनी आपल्याला धमकीचे फोन येत असल्याचा गंभीर दावा केला आहे. या दाव्यामुळे चित्रपटाच्या प्रदर्शनापूर्वीच चर्चांना उधाण आले आहे.

अशोक खरात प्रकरणावर आधारित ‘महाराष्ट्र एपस्टीन फाईल्स’ या चित्रपटाचे दिग्दर्शन स्वरूप बी. सावंत करत आहेत. या चित्रपटात दीपाली सय्यद महत्त्वाच्या भूमिकेत दिसणार असल्याची चर्चा आहे.

याबाबत बोलताना त्यांनी दावा केला की, चित्रपटात काम करू नये, विशिष्ट भूमिका साकारू नये, यासाठी काही जणांकडून त्यांच्यावर दबाव टाकला जात आहे.

“मला काही धमकीचे फोन येत आहेत. हा चित्रपट करू नका, हा रोल करू नका, असे सांगितले जात आहे. मात्र मी कलाकार आहे आणि माझं काम करणं हे माझं व्यावसायिक कर्तव्य आहे. कर नाही त्याला डर कशाला? कुणाच्याही दबावाला मी बळी पडणार नाही,” असे दीपाली सय्यद यांनी स्पष्टपणे सांगितले.

दीपाली सय्यद यांच्या पाठीशी शिवसेना चित्रपट सेना :

या प्रकरणावर प्रतिक्रिया देताना शिवसेना चित्रपट सेनेचे अध्यक्ष सुशांत शेलार यांनी दीपाली सय्यद यांना जाहीर पाठिंबा दिला आहे. सुशांत शेलार म्हणाले, “दीपाली सय्यद या अनुभवी आणि लोकप्रिय अभिनेत्री आहेत. त्यांनी अनेक चित्रपट आणि मालिकांमध्ये उत्कृष्ट काम केले आहे.

एखाद्या कलाकाराला विशिष्ट भूमिका करू नये म्हणून धमक्या देणे हे अत्यंत चुकीचे आहे. कलाकाराला अभिव्यक्ती स्वातंत्र्याचा अधिकार आहे. कोणती भूमिका स्वीकारायची किंवा नाकारायची, हा निर्णय पूर्णपणे कलाकाराचा असतो.”

ते पुढे म्हणाले, “चित्रपटाची कथा नेमकी काय आहे, संबंधित भूमिका कशी आहे, हे अद्याप कुणालाही पूर्णपणे माहिती नाही. अशा परिस्थितीत आधीच विरोध करणे किंवा दबाव टाकणे योग्य नाही. दीपाली ताईंनी अशा धमक्यांना भीक घालू नये. शिवसेना चित्रपट सेना त्यांच्या पाठीशी ठामपणे उभी आहे.”

राजकीय दबावाचा आरोप :

दीपाली सय्यद यांनी काही महिला राजकीय नेत्यांकडूनही फोन आल्याचा दावा केला आहे. “माझं राजकीय करिअर उद्ध्वस्त होईल, अशा प्रकारचे इशारे मला दिले जात आहेत. मात्र मी कोणत्याही दबावाला घाबरणार नाही. या सर्व बाबींबाबत मी माझ्या पक्ष नेतृत्वाशी चर्चा करणार आहे,” असे त्यांनी म्हटले.

२ ऑक्टोबरला चित्रपट प्रदर्शित होणार :

निर्मात्यांकडून मिळालेल्या माहितीनुसार, ‘महाराष्ट्र एपस्टीन फाईल्स’ या चित्रपटाचे चित्रीकरण पुढील महिन्यात सुरू होणार असून, चित्रपट २ ऑक्टोबर रोजी प्रदर्शित करण्याचे नियोजन आहे. ‘आता सगळं उघड होणार…!’ ही चित्रपटाची टॅगलाईन सध्या चर्चेचा विषय ठरली आहे.