लॉर्ड्सच्या मैदानावर भारताविरुद्ध तिसऱ्या कसोटी सामन्यात इंग्लंडने विजय मिळवला खरा, पण स्लो ओव्हर रेटमुळे त्यांना मोठा झटका बसला आहे. आंतरराष्ट्रीय क्रिकेट परिषदेने (ICC) इंग्लंडवर मॅच फीच्या 10 टक्के दंड ठोठावला असून, वर्ल्ड टेस्ट चॅम्पियनशिप (WTC) मधील दोन गुण कपात केले आहेत. यामुळे इंग्लंडची WTC गुणतालिकेतील विजय टक्केवारी 66.67 वरून 61.11 वर घसरली, आणि संघ दुसऱ्या स्थानावरून तिसऱ्या क्रमांकावर खाली आला.

स्लो ओव्हर रेटमुळे दंड
आयसीसीच्या एलिट पॅनलचे मॅच रेफरी रिची रिचर्डसन यांनी इंग्लंडला स्लो ओव्हर रेटसाठी दोषी ठरवले. इंग्लंडने निर्धारित वेळेत दोन ओव्हर कमी टाकले. आयसीसीच्या कोड ऑफ कंडक्टच्या आर्टिकल 2.22 नुसार, प्रत्येक कमी टाकलेल्या ओव्हरसाठी मॅच फीच्या 5 टक्के दंड आकारला जातो. त्यानुसार, इंग्लंडवर 10 टक्के दंड आणि दोन WTC गुण कपात करण्यात आली.

बेन स्टोक्सने मान्य केली चूक
इंग्लंडचा कर्णधार बेन स्टोक्सने स्लो ओव्हर रेटचा गुन्हा कबूल केला आणि प्रस्तावित दंड स्वीकारला. त्यामुळे या प्रकरणी औपचारिक सुनावणीची गरज पडली नाही. मैदानावरील अंपायर पॉल रीफेल, शरफुद्दौला इब्ने शाहिद, तिसरे अंपायर अहसान रझा आणि चौथे अंपायर ग्रॅहम लॉयड यांनी इंग्लंडवर हे आरोप निश्चित केले, ज्याला मॅच रेफरीने मान्यता दिली. या घटनेमुळे इंग्लंडच्या विजयावर विरजण पडले असून, WTC गुणतालिकेतील त्यांच्या स्थानाला धक्का बसला आहे.