England Beat Pakistan By An Innings And 103 Runs Headingley Test : इंग्लंड आणि पाकिस्तान यांच्यात हेडिंग्ले मैदानावर खेळल्या गेलेल्या पहिल्या कसोटी सामन्यात यजमान इंग्लंडने पाकिस्तानचा एक डाव आणि १०३ धावांनी (Innings and 103 runs) दारुण पराभव केला आहे. अवघ्या तीन दिवसांत संपलेल्या या लढतीत पाकिस्तानचा दुसरा डाव केवळ १३५ धावांवर आटोपला. दोन्ही डावांत पाकिस्तानी फलंदाजांनी सपशेल नांगी टाकल्याने इंग्लंडने तीन सामन्यांच्या कसोटी मालिकेत १-० अशी भक्कम आघाडी घेतली आहे.

लीड्सच्या मैदानावर पाकिस्तानचा सलग दुसऱ्यांदा डावाने पराभव –

लीड्सच्या हेडिंग्ले मैदानावर पाकिस्तानचा संघ सलग दुसऱ्यांदा एका डावाने पराभूत झाला आहे. यापूर्वी २०१८ मध्ये याच मैदानावर इंग्लंडने पाकिस्तानला एक डाव आणि ५५ धावांनी धूळ चारली होती. पहिल्या डावात पाकिस्तानचा डाव १७१ धावांत गुंडाळल्यानंतर इंग्लंडने ८ बाद ३६६ धावांवरून पुढे खेळताना पहिल्या डावात ४०९ धावांचा डोंगर उभा केला आणि २३८ धावांची भक्कम आघाडी मिळवली. या प्रचंड दबावाखाली पाकिस्तानी फलंदाजी पुन्हा एकदा पत्त्याच्या बंगल्यासारखी कोसळली.

दुसऱ्या डावात अवघ्या १३५ धावांत गारद; ७ फलंदाज अपयशी –

England beat Pakistan by an innings and 103 runs.
A disappointing Test defeat for Pakistan.
England dominated with both bat and ball.#ENGvsPAK #PakistanCricket #EnglandCricket #TestCricket pic.twitter.com/FcOYD0kjs2

— Nauman CTB (@NomiJad00n) August 21, 2026

दुसऱ्या डावात पाकिस्तानची सुरुवात अत्यंत खराब झाली. वेगवान गोलंदाज जोफ्रा आर्चरने दुसऱ्याच षटकात इमाम-उल-हकला (०) शून्यावर माघारी धाडले, तर सलामीवीर अझान अवैसही ९ धावांवर बाद झाला. अब्दुल्ला शफीक (१५), सौद शकील (१४), शान मसूद (२९) आणि कर्णधार सलमान अली आगा (४) स्वस्तात बाद झाले. पाकिस्तानचे ७ फलंदाज दुहेरी आकडाही गाठू शकले नाहीत. केवळ यष्टीरक्षक मोहम्मद रिझवानने ४१ धावांची एकाकी झुंज दिली; मात्र दुसऱ्या टोकाकडून साथ न मिळाल्याने संपूर्ण संघ १३५ धावांत गारद झाला.

हेही वाचा – पाकिस्तानची पुन्हा उडाली खिल्ली! सोपा रनआऊट सोडून अपीलमध्ये गुंतले खेळाडू, VIDEO होतोय व्हायरल

टंग-रॉबिन्सनच्या तुफानी माऱ्याने सामन्याचा निकाल लावला –

इंग्लंडच्या या मोठ्या विजयाचा पाया पहिल्याच डावात रचला गेला होता, जिथे जोश टंग (५/४६) आणि ऑली रॉबिन्सन (५/५१) यांनी पाकिस्तानचा निम्मा-निम्मा संघ तंबूत धाडला होता. त्यानंतर फलंदाजीत जो रूट (६६), हॅरी ब्रूक (९१) आणि जॉर्डन कॉक्स (७३) यांनी केलेल्या फटकेबाजीमुळे इंग्लंडने सामन्यावर पूर्ण नियंत्रण मिळवले. पाकिस्तानविरुद्धचा हा एकतर्फी विजय जागतिक कसोटी अजिंक्यपद (WTC) गुणतालिकेत इंग्लंडचे स्थान अधिक मजबूत करणारा ठरला आहे.