नाशिक – उत्तर महाराष्ट्रातील सरकारी नोंदणीकृत कंत्राटदाराकडून प्रलंबित बिले काढण्यासाठी आणि नवीन प्रकल्प मंजूर करण्यासाठी 3.50 लाख रुपयांची लाच घेताना सार्वजनिक बांधकाम विभागाच्या (पीडब्ल्यूडी) कार्यकारी अभियंत्याला अटक करण्यात आली आहे. लाचलुचपत विभागाच्या (एसीबी) अधिकाऱ्यांनी शुक्रवारी याबाबत माहिती दिली आहे.

नंदुरबार जिल्ह्यातील शहादा तालुक्‍यात कार्यरत असलेले अभियंता महेश प्रतापराव पाटील यांना गुरुवारी त्यांच्या राहत्या घरी लाचेची रक्कम घेताना पकडण्यात आले होते.

अधिकाऱ्यांनुसार शासकीय कंत्राटदाराने नंदुरबार जिल्ह्यातील विविध रस्त्यांची कामे पूर्ण केली असून, शहादा येथील कार्यकारी अभियंता कार्यालयात मंजुरीसाठी जवळपास 4 कोटी रुपयांची बिले प्रलंबित आहेत. कंत्राटदाराने 5.33 कोटी रुपयांच्या तीन नवीन प्रकल्पांच्या निविदाही जिंकल्या होत्या आणि त्यांच्या कार्यादेशांना पाटील यांच्या मंजुरीची प्रतीक्षा होती, त्यासाठी त्यांनी 43 लाख रुपयांची लाच मागितल्याचे उघड झाले आहे.