ENG vs WI 1st Test : इंग्लंडने विजयासह जेम्स अँडरसनला दिला निरोप, वेस्ट इंडिजचा एक डाव आणि 114 धावांनी केला पराभव…
ENG vs WI 1st Test Match Result : महान गोलंदाज जेम्स अँडरसनला इंग्लंडने विजयासह निरोप दिला. पहिल्या कसोटी सामन्यात इंग्लंडने वेस्ट इंडिजचा एक डाव आणि 114 धावांनी पराभव केला आहे. या विजयासह इंग्लंड संघाने तीन सामन्यांच्या कसोटी मालिकेत 1-0 अशी आघाडी घेतली आहे.
A fitting end to an extraordinary career 🌟
James Anderson ends up with a career haul of 704 wickets as England take a 1-0 lead in the two-match Test series.#WTC25 | #ENGvWI 📝: https://t.co/WxFa3tTYfo pic.twitter.com/jz68gKYcPU
— ICC (@ICC) July 12, 2024
अँडरसनने कारकिर्दीतील 188 वा सामना खेळला. इंग्लंडने तिसऱ्या दिवशीच वेस्ट इंडिजचा पराभव करून सामना जिंकला. अँडरसनने फेअरवेल टेस्ट मॅचमध्ये एकूण चार विकेट घेतल्या. अँडरसन याने पहिल्या डावात एक तर दुसऱ्या डावात तीन विकेट घेतल्या. या कसोटीसह जेम्स अँडरसनची 21 वर्षांची कारकीर्दही संपुष्टात आली. स्विंगचा बादशहा मानल्या जाणाऱ्या जेम्स अँडरसनने वयाच्या 41 व्या वर्षी शेवटची कसोटी खेळली.
वेस्टइंडियविरूध्दच्या पहिल्या कसोटी सामन्यात इंग्लडंने टाॅस जिंकून गोलंदाजीचा निर्णय घेतला होता. त्यानंतर प्रथम फलंदाजीला आलेल्या वेस्ट इंडिजचा संघ पहिल्या डावात केवळ 121 धावा करू शकला. यानंतर इंग्लंडने पहिल्या डावात 371 धावसंख्येपर्यंत मजल मारली होती. यामध्ये इंग्लंडकडून जॅक क्रॉलीने 76 धावा, ऑली पोपने 57 धावा, जो रूटने 68 धावा, हॅरी ब्रूकने 50 धावा आणि जेमी स्मिथने 70 धावांचे योगदान दिले होते. अशाप्रकारे पहिल्या डावानंतर यजमानांनी वेस्ट इंडिजवर 250 धावांची आघाडी घेतली होती. त्यानंतर दुसऱ्या डावात कॅरेबियन संघ अवघ्या 136 धावांत गडगडला.
अँडरसनचा विक्रम मोडणे अशक्य…
मे 2003 मध्ये पहिली कसोटी खेळणाऱ्या जेम्स अँडरसनने कसोटी क्रिकेटमध्ये 704 विकेट घेतल्या. कसोटी क्रिकेटमध्ये सर्वाधिक विकेट घेणारा तो वेगवान गोलंदाज आहे. अँडरसनचा हा विक्रम मोडणे केवळ अवघडच नाही तर जवळजवळ अशक्य आहे. अँडरसनने 21 वर्षांच्या कारकिर्दीत एकूण 188 कसोटी खेळल्या. या काळात त्याने 704 विकेट घेतल्या. अँडरसनने कसोटी क्रिकेटमध्ये 32 वेळा एका डावात पाच किंवा त्याहून अधिक विकेट घेतल्या आहेत. जगातील अन्य कोणत्याही वेगवान गोलंदाजाला ही कामगिरी करता आली नाही.
