Pimparkhed Encroachment: पिंपरखेड (ता. शिरूर) येथील गायरान गट नंबर ३५८/१अ मधील शासकीय जागेवर करण्यात आलेली अनधिकृत व्यावसायिक अतिक्रमणे ग्रामपंचायत प्रशासन, महसूल विभाग आणि पोलीस बंदोबस्तात शुक्रवार, दि. २० रोजी हटवण्यात आली. अनेक दिवसांपासून प्रलंबित असलेली ही कारवाई अखेर मार्गी लागली असून, या धडक मोहिमेमुळे पिंपरखेड गावठाण व गायरान भागातील अतिक्रमणधारकांचे धाबे दणाणले आहेत. पिंपरखेड ग्रामपंचायतीने दिलेल्या माहितीनुसार, संबंधित गायरान जमिनीवर व्यावसायिकांनी विनापरवाना पत्राशेड आणि टपऱ्यांचे अतिक्रमण केले होते. यासंदर्भात ग्रामपंचायतीने संबंधितांना वारंवार नोटिसा बजावून स्वतःहून अतिक्रमणे काढून घेण्याच्या सूचना दिल्या होत्या. मात्र, प्रशासनाने दिलेल्या मुदतीत अतिक्रमणे न काढल्याने अखेर सर्व कायदेशीर प्रक्रिया पूर्ण करत पोलीस बंदोबस्तात शुक्रवारी ही धडक कारवाई करण्याचा निर्णय घेण्यात आला. परिसरात तणावाचे वातावरण- कारवाई सुरू होताच काही टपरीधारक व्यावसायिकांनी याला कडाडून विरोध केला, ज्यामुळे काही काळ परिसरात तणावाचे वातावरण निर्माण झाले होते. मात्र, उपस्थित पोलीस अधिकारी आणि महसूल विभागाच्या कर्मचाऱ्यांनी आक्रमक पवित्रा घेतलेल्या नागरिकांना कायद्याची समज दिली. शासकीय जागेवरील अतिक्रमण नियमानुसार काढणे बंधनकारक असल्याचे प्रशासनाने सांगत कोणाचेही ऐकून न घेता कारवाई सुरूच ठेवली. अखेर प्रशासनाच्या खंबीर भूमिकेमुळे अतिक्रमण धारकांनी आपले साहित्य व शेडचे मटेरियल ताब्यात घेऊन जागा मोकळी केली. या मोहिमेसाठी मंडलाधिकारी राजेंद्र पोटकुले, पोलीस उपनिरीक्षक दिलीप पवार, ग्राममहसूल अधिकारी सुग्रीव मुंढे, ग्रामविकास अधिकारी आशिष भागवत यांच्यासह मोठा पोलीस फौजफाटा तैनात करण्यात आला होता. या कार्यवाही वेळी पिंपरखेडचे सरपंच राजेंद्र दाभाडे, सोसायटीचे अध्यक्ष किरण ढोमे, रामदास ढोमे, बाळशिराम ढोमे, दामोदर दाभाडे, उपसरपंच विकास वरे, लक्ष्मण गायकवाड, बळवंत बोंबे, रामदास दरेकर, बबनराव बोंबे आदींसह सर्व ग्रामपंचायत सदस्य तसेच मोठ्या संख्येने गावातील ग्रामस्थ रात्री नऊ वाजेपर्यंत उपस्थित होते. यावेळी कोणताही अनुचित प्रकार घडू नये यासाठी प्रशासनाच्या वतीने सकाळपासूनच रुग्णवाहिका, अग्निशमन दल आणि ड्रोनद्वारे चित्रीकरणाची व्यवस्था करण्यात आली होती. पोलिसांच्या चोख बंदोबस्तात ही संपूर्ण प्रक्रिया शांततेत पार पडली असून शासकीय जागा आता पूर्णपणे अतिक्रमणमुक्त झाली आहे.
