Imran Khan – पाकिस्तानचे माजी पंतप्रधान इम्रान खान यांच्या पीटीआय या पक्षाच्या निवडणूक चिन्हाचे प्रकरण सर्वोच्च न्यायालयात पोहोचले आहे. सुनावणीदरम्यान पाकिस्तानचे मुख्य न्यायाधीश काझी फैज इसा म्हणाले की, निवडणूक आयोगाचे काम सर्वोच्च न्यायालय करणार नाही. न्या. ईसा, न्या. मोहम्मद अली मजहर आणि न्या. मसरत हिलाली यांच्या खंडपीठासमोर सुनावणी सुरू आहे.

अलीकडेच, पाकिस्तानच्या निवडणूक आयोगाने पीटीआयला दणका दिला होता आणि अंतर्गत निवडणुका न घेतल्याच्या आरोपावरून निवडणूक चिन्ह वापरण्यास बंदी घातली होती. निवडणूक आयोगाच्या या निर्णयाविरोधात पीटीआयने पेशावर उच्च न्यायालयात याचिका दाखल केली.

पीटीआयला दिलासा देत पेशावर उच्च न्यायालयाने निवडणूक आयोगाच्या निर्णयाला स्थगिती दिली होती. पेशावर उच्च न्यायालयाच्या या निर्णयाविरोधात पाकिस्तान निवडणूक आयोगाने सर्वोच्च न्यायालयात धाव घेतली आहे.

निवडणूक आयोगाच्या याचिकेवर सुनावणी करताना सरन्यायाधीश इसा म्हणाले की, जर निवडणूक आयोग त्यांचे काम करत असतील, तर आम्ही त्यांचे काम करणार नाही आणि ते कसे करायचे आणि ते कसे चांगले करायचे ते आम्ही त्यांना सांगणार नाही.

निवडणूक आयोग ही केवळ अर्ध-न्यायिक संस्था नसून ती एक घटनात्मक संस्था आहे. त्याची दोन कार्ये म्हणजे राजकीय पक्षांचे नियमन करणे आणि मुक्त आणि निष्पक्ष निवडणुका घेणे.

सुनावणीदरम्यान पीटीआयच्या वतीने वकील हमीद खान युक्तिवाद करत आहेत, तर वकील मखदूम अली खान निवडणूक आयोगाची बाजू मांडत आहेत. पाकिस्तानमध्ये ८ फेब्रुवारी रोजी सार्वत्रिक निवडणुका होणार आहेत. आपल्याला निवडणूक प्रक्रियेपासून दूर ठेवण्याचा प्रयत्न केला जात असल्याचा आरोप पीटीआयने केला आहे.