वडगाव मावळ  – राज्य निवडणूक आयोगाने जिल्ह्यातील ग्रामपंचायतीतील निधन, राजीनामा, अनर्हता किंवा अन्य कारणांमुळे रिक्त झालेल्या पदांच्या पोटनिवडणूकीचा कार्यक्रम जाहीर केला आहे. 5 जून रोजी मतदान तर 6 जून रोजी मतमोजणी होणार आहे. या संदर्भात तहसिलदार निवडणूकीची नोटीस गुरुवारी (दि. 5 मे) प्रसिद्ध करणार आहेत.

रिक्त झालेल्या जागांसाठी इछुक उमेदवारांना दिनांक 13 मे ते 20 मे या कालावधीत दिनांक 14, 15 व 16 मे ची सार्वजनिक सुटी वगळून सकाळी 11 ते दुपारी 3 या वेळेत नामनिर्देशन पत्र सादर करता येणार आहे.

नामनिर्देशनपत्रांची छाननी 23 मे रोजी सकाळी 11 वाजल्यापासून होईल आणि छाननी संपेपर्यंत ही प्रक्रीया चालेल. नामनिर्देशनपत्र मागे घेण्याचा अंतिम दिनांक 25 मे असून वेळ दुपारी 3 वाजेपर्यंत आहे. त्याच दिवशी दुपारी 3 वाजल्यानंतर निवडणूक चिन्ह नेमून देण्यात येऊन अंतिमरित्या निवडणूक लढविणाऱ्या उमेदवारांची यादी प्रसिद्ध करण्यात येईल.

मतदान 5 जून रोजी सकाळी साडे सात ते सायंकाळी साडेपाच या वेळेत होणार आहे. मतमोजणी 6 जून रोजी जिल्हाधिकाऱ्यांच्या मान्यतेने तहसिलदार निश्‍चित करतील. जिल्हाधिकारी कार्यालयामार्फत 9 जून पर्यंत निवडणूक निकालाची अधिसूचना प्रसिद्ध करण्यात येणार आहे.