पिंपरी (प्रतिनिधी) – लोकसभा निवडणूक होत असतानाच मावळ मतदार संघासाठी चौथ्या टप्प्यात म्हणजेच १३ मे रोजी मतदान होणार आहे. चिंचवड विधानसभा मतदार संघासाठी आवश्‍यक असणारी मतदान यंत्रे उपलब्ध करण्यात आली आहेत. ही यंत्रे थेरगाव येथील स्व. शंकर अण्णा गावडे कामगार भवन येथे तयार करण्यात आलेल्या स्ट्राँग रूममध्ये ठेवण्यात आली आहेत. सुरक्षेसाठी याठिकाणी २४ तास पोलिसांचा बंदोबस्त ठेवण्यात आला आहे.

स्ट्रॉंग रुममध्ये ठेवण्यात आलेल्या निवडणूक यंत्रांमध्ये कंट्रोल युनिट ७७९, बॅलेट युनिट ७७९ व व्हीव्हीपॅट ८४९ असे २ हजार ४०७ मतदान यंत्रांचा समावेश आहे. ही रूम सीलबंद आहे. शिवाय सुरक्षेची सर्व काळजी घेण्यात आली आहे. पुरेसा पोलीस बंदोबस्तही ठेवण्यात आला आहे, अशी माहिती सहायक निवडणूक निर्णय अधिकारी विठ्ठल जोशी यांनी दिली.

मावळ लोकसभेची निवडणूक चौथ्या टप्प्यात म्हणजे १३ मेला होणार आहे. त्यासाठी विधानसभा मतदारसंघानुसार मतदान यंत्रे तयार करण्याचे काम सुरू आहे. जिल्हा निवडणूक निर्णय अधिकाऱ्यांच्या सूचनेनुसार चिंचवड विधानसभा मतदारसंघात मतदानासाठी आवश्यक मतदान यंत्रे कोरेगाव पार्क येथील वखार महामंडळाच्या गोडाऊनमधून आणण्यात आली आहेत.

ही यंत्र थेरगाव येथे स्ट्राँगरूममध्ये ठेवण्यात आली आहेत. स्ट्राँगरूम सील करण्यात आली आहे. तसेच, स्ट्रॉगरूम परिसरात मोठा पोलीस बंदोबस्त ठेवण्यात आला आहे. निवडणूक प्रक्रिया पूर्ण होईपर्यंत याठिकाणी २४ तास पोलीस बंदोबस्त ठेवण्यात येणार आहे.

याबाबत सहायक निवडणूक निर्णय अधिकारी विठ्ठल जोशी म्हणाले, पोलिस बंदोबस्तामध्ये मतदान यंत्रे आणली आहेत. ते स्ट्राँगरूममध्ये सुरक्षितपणे ठेवण्यात आली आहेत. याठिकाणी कडेकोट पोलीस बंदोबस्त ठेवण्यात आला आहे.