मुंबई: मराठा समाजाला सरसकट कुणबी दाखले देण्याच्या मागणीसह अन्य मागण्यांसाठी उपोषणाला बसलेले मनोज जरांगे यांच्या 8 पैकी 6 मागण्या राज्य सरकारने मान्य केल्या. गेल्या वर्षीप्रमाणे यंदाही शासकीय अध्यादेशाद्वारे जरांगे यांचे उपोषण सोडवण्यात सरकारला यश आले. मराठा आरक्षणविषयक मंत्रिमंडळ उपसमितीचे अध्यक्ष राधाकृष्ण विखे पाटील आणि सहकाऱ्यांनी तीन दिवसांच्या सर्वंकष चर्चेनंतर तयार केलेला मसुदा जरांगे यांनी स्वीकारला. गतवर्षी मुख्यमंत्री एकनाथ शिंदे यांनी स्वतः पुढाकार घेऊन जरांगे यांचे उपोषण सोडवले होते, परंतु यावेळी त्यांच्या अनुपस्थितीची चर्चा झाली. उपोषण संपल्यानंतर शिंदे यांनी पडद्यामागील घडामोडी स्पष्ट केल्या. ते म्हणाले, “मराठा समाजासह सर्व समाजघटकांच्या हक्कांसाठी सरकार सकारात्मक आहे. कुणाचेही आरक्षण कमी न करता मराठा समाजाला आरक्षण देण्याचा शब्द पाळला. मृतकांच्या नातेवाइकांना १० लाख रुपये, शैक्षणिक अर्हतेनुसार नोकऱ्या आणि आंदोलकांवरील गुन्हे मागे घेण्याची प्रक्रिया सप्टेंबरअखेर पूर्ण होईल.” सरकारचा निर्णय आणि शिंदे यांचा पुनरुच्चार जरांगे यांनी समाजासाठी मोठा लढा दिल्याचे सांगत शिंदे यांनी त्यांचे आभार मानले. ते म्हणाले, “मुख्यमंत्री देवेंद्र फडणवीस, अजित पवार आणि मंत्रिमंडळ उपसमितीने सर्वंकष चर्चा करून सकारात्मक निर्णय घेतले. हैदराबाद गॅझेटियर लागू करण्याचा अध्यादेश काढला गेला. गावातील किंवा कुळातील कुणबी प्रमाणपत्राच्या आधारे प्रतिज्ञापत्र सादर करून छाननीनंतर प्रमाणपत्रे दिली जातील. तालुकास्तरीय अधिकाऱ्यांमार्फत ही प्रक्रिया गतिमान होईल.” मराठा आरक्षणाची पार्श्वभूमी शिंदे यांनी सांगितले की, यापूर्वी न्या. शिंदे समितीने ५८ लाख नोंदी शोधून १० लाख ३५ हजार प्रमाणपत्रे दिली. तसेच, न्या. सुनील शुक्रे आयोगाने २ कोटी ५८ लाख घरांचा सर्व्हे करून मराठा समाजाचे सामाजिक, शैक्षणिक आणि आर्थिक मागासलेपण सिद्ध केले, ज्यामुळे १० टक्के आरक्षण देण्यात आले. पडद्यामागील घडामोडी सातारा गॅझेटमधील त्रुटी आणि कायदेशीर अडचणींमुळे निर्णय घेण्यास वेळ लागला. शिंदे, फडणवीस आणि अजित पवार यांनी महाधिवक्ता आणि अभ्यासकांशी सातत्याने चर्चा केली. कोर्टात टिकेल असा निर्णय घेण्यासाठी सरकारने शासकीय अध्यादेश काढला. “उपोषण सोडवण्यासाठी शिंदे हवेत” जरांगे यांनी उपोषण सोडवण्यासाठी शिंदे यांची गरज असल्याचे म्हटले होते. त्यावर शिंदे म्हणाले, “जरांगे यांचा कोणताही वैयक्तिक अजेंडा नाही. ते समाजासाठी काम करणारे नेते आहेत.”
