Eknath Shinde Meet Tiger Shroff :  बॉलिवूड अभिनेते जॅकी श्रॉफ यांचा मुलगा अभिनेता टायगर श्रॉफच्या गाडीवर जुहू परिसरात गोळीबार करण्यात आल्याने एकच खळबळ उडाली आहे. अचानक झालेल्या हल्ल्यात अभिनेता टायगर श्रॉफ, त्याचा चालक आणि एक रिक्षाचालक जखमी झाले आहे. या गोळीबारानंतर टायगर श्रॉफ थोडक्यात बचावला असून तो आता सुखरुप आहे. या घटनेनंतर उपमुख्यमंत्री एकनाथ शिंदे यांनी टायगरच्या घरी जाऊन त्याची भेट घेतली आणि विचारपूस केली.

या भेटीदरम्यानचे फोटो समोर आले असून, यात टायगर श्रॉफच्या हातावर पट्टी बांधलेली दिसत होती, तसेच त्याच्या खांद्यावर आणि छातीवरही मलमपट्टी केलेली पाहायला मिळते. भेटीनंतर पत्रकारांशी बोलताना एकनाथ शिंदे यांनी सांगितले की, ही एक गंभीर घटना आहे. पाच राऊंड गोळीबार झाला, पण सुदैवाने तो सुरक्षित आहे. त्याचा ड्रायव्हर जखमी झाला असून, ही घटना निषेधार्ह आहे.

मी अभिनेत्याची भेट घेतली. दारूगोळा आणि काचेच्या तुकड्यांमुळे त्याच्या डाव्या हाताला जखमा झाल्या आहेत. या घटनेमुळे अभिनेता आणि त्याचे कुटुंब खूप चिंतेत आहे. मी त्यांना खात्री दिलीय की राज्य सरकार त्यांच्या पाठीशी खंबीरपणे उभे आहे. आम्ही या गुंडगिरीचा पूर्णपणे नायनाट करू. यापुढे कोणत्याही प्रकारची धमकी खपवून घेतली जाणार नाही. जबाबदार लोकांवर कठोर कारवाई केली जाईल,” असे आश्वासन त्यांनी दिले आहे.

पुढे ते म्हणाले, “मुंबईत कोणत्याही टोळीला किंवा व्यक्तीला दहशत आणि गुंडगिरी करण्यास परवानगी दिली जाणार नाही. कोणालाही सोडले जाणार नाही. मुख्यमंत्री देवेंद्र फडणवीस यांनीही ही घटना गांभीर्याने घेतली आहे. १९९० च्या दशकात मुंबईतील टोळीयुद्धे रोखण्यात आली होती आणि आता ती पुन्हा उफाळून देणार नाही. राज्य सरकार आणि पोलीस गुन्हेगारांवर कारवाई करतील. कुणालाही धमकीचे कोणतेही फोन आल्यास तात्काळ पोलिसांना कळवावे,” असं आवाहन उपमुख्यमंत्री शिंदे यांनी कलाकारांना केले. दरम्यान, मुख्यमंत्री देवेंद्र फडणवीस यांनीही टायगर श्रॉफसोबत संवाद साधल्याची माहिती समोर आली आहे.

हेही वाचा : 

Shree Mahalakshmi Temple: मानवी मूल्ये जपण्याची जबाबदारी मानव संसाधन व्यवस्थापकांची-ज्येष्ठ उद्योजक प्रदीप भार्गव