मुंबई : आज बाळासाहेब ठाकरे यांची 99 वी जयंती आहे. त्यानिमित्ताने मुंबईतील बीकेसीत शिवसेनेकडून मेळाव्याचे आयोजन करण्यात आले होते. यावेळी उपमुख्यमंत्री एकनाथ शिंदे यांनी उद्धव ठाकरेंवर निशाणा साधत घणाघाती टीका केली.

काय म्हणाले एकनाथ शिंदे?
आज शिवसेना प्रमुखांची जंयती आहे, त्यांना फक्त शिवसेना प्रमुखांची जंयती एवढंच आठवते. मात्र स्मारकात गेल्यावर ज्या लोकांनी बाळासाहेबांची विचार सोडले त्यांना बोलवणार नाही. खरं म्हणजे जे बाळासाहेबांच्या विचारांचे मारक आहेत, ते काय बांधणार स्मारक? अशी परिस्थिती आहे. म्हणून तुम्हाला हे बोलण्याच नैतिक अधिकार नाही. कारण बाळासाहेबांचे विचार 2019 लाच सोडण्याच पाप तुम्ही केलं. म्हणून मी सांगतो त्यादिवशी खऱ्या अर्थाने बाळासाहेबांच्या स्मारकावर जाण्यापूर्वी त्यांनी बाळासाहेबांची नाक घासून माफी मागावी.

दोन अडीच वर्षात पायाला भिंगरी लावून आपण काम केलं. एकही क्षण आपण वाया घालवला नाही. म्हणूनच विजय मिळाला. विकास कामे चौपट पटीने केली. लोकाभिमूख योजना केल्या आणि विकासही केला. दोन्हीची सांगड घातली. त्यामुळेच राज्यातील जनतेने विश्वास दाखवला. म्हणूनच मी जनतेसमोर नतमस्तक होतो. त्यांनाही वंदन करतो, असेदेखील एकनाथ शिंदे म्हणाले.

डीसीएम म्हणजे डेडीकेटेड टू कॉमन मॅन
बाळासाहेबांनी स्वाभिमान शिकवला. अडीच वर्षात मी किती वर्षाचं काम केलं त्याचं मोजमाप तुम्ही करा. लोक म्हणायचे सीएम म्हणजे चीफ मिनिस्टर. मी म्हणतो सीएम म्हणजे कॉमन मॅन. आता देवेंद्र फडणवीस सीएम आहे. मी डीसीएम आहे. डीसीएम म्हणजे डेडीकेटेड टू कॉमन मॅन असे म्हणत त्यांनी DCM चा अर्थदेखील सांगितला.

‘या’ आमदारांची मेळाव्याकडे पाठ
या मेळाव्याला उपमुख्यमंत्री एकनाथ शिंदे यांच्यासह प्रमुख नेते हजर होते. पण शिवसेना मेळाव्याला आमदार तानाजी सावंत आणि अब्दूल सत्तार गैरहजर आहे. शिवसेना मेळाव्यात सर्व विजयी आमदारांचा सत्कार करण्यात आला. मात्र आमदार तानाजी सावंत आणि अब्दूल सत्तार यांनी या सत्कार सोहळ्यास अनुउपस्थित राहून त्यांची नाराजी पुन्हा एकदा उघड केली आहे.