Pune : पर्यावरणपूरक गणेशोत्सवाचा संदेश विद्यार्थ्यांपर्यंत पोहोचविण्यासाठी नगरसेवक हर्षवर्धन दीपक मानकर यांच्या पुढाकाराने शाडूच्या मातीपासून गणेशमूर्ती तयार करण्याच्या उपक्रमाचे आयोजन करण्यात आले. केळेवाडी येथील पुणे महापालिकेच्या कै. मामासाहेब मोहोळ शाळा आणि जय भवानीनगर येथील यशवंतराव चव्हाण विद्यालयातील विद्यार्थ्यांनी या उपक्रमात उत्स्फूर्त सहभाग घेतला.

दिवा प्रतिष्ठान आणि स्ट्रोक फाउंडेशनच्या स्नेहल कुलकर्णी व चैतन्य पानसे यांच्या वतीने हा उपक्रम राबविण्यात आला. विद्यार्थ्यांनी आपल्या कल्पकतेचा आणि कलागुणांचा वापर करून शाडूच्या मातीपासून आकर्षक गणेशमूर्ती तयार केल्या. स्वतःच्या हाताने बाप्पाची मूर्ती घडविताना विद्यार्थ्यांमध्ये मोठा उत्साह दिसून आला. विद्यार्थ्यांनी तयार केलेल्या मूर्तींचे यावेळी कौतुक करण्यात आले.

नगरसेवक हर्षवर्धन दीपक मानकर म्हणाले, “गणेशोत्सव हा श्रद्धा आणि संस्कृतीचा सण आहे. मात्र, हा सण साजरा करताना पर्यावरणाचे संरक्षण करणेही तितकेच महत्त्वाचे आहे. विद्यार्थ्यांनी शाडूच्या मातीपासून गणेशमूर्ती तयार करून पर्यावरणपूरक गणेशोत्सवाचा दिलेला संदेश कौतुकास्पद आहे. लहान वयातच पर्यावरण संवर्धनाची जाणीव निर्माण झाली, तर हीच मुले भविष्यात समाजात सकारात्मक बदल घडवू शकतील.”

विद्यार्थ्यांमध्ये पर्यावरणपूरक गणेशोत्सवाची जागरूकता निर्माण व्हावी तसेच त्यांच्या कलागुणांना आणि सर्जनशीलतेला प्रोत्साहन मिळावे, या उद्देशाने दिवा प्रतिष्ठानच्या वतीने दरवर्षी हा उपक्रम राबविण्यात येतो.

या उपक्रमामुळे विद्यार्थ्यांमध्ये पर्यावरणाबाबतची जाणीव वाढण्यास मदत झाली. तसेच स्वतःच्या हाताने गणेशमूर्ती तयार करण्याचा आनंदही विद्यार्थ्यांना मिळाला.

यावेळी मुख्याध्यापिका उभे मॅडम, नवनाथ खिलारे, कांता खिलारे, तृप्ती निलेश शिंदे, शाळेतील शिक्षक व कर्मचारी तसेच पालक उपस्थित होते.