मुंबईः मुंबईत लाल चंदनाची तस्करी करणाऱ्याचा प्रयत्न रेल्वे दक्षता विभागाने उधळून लावला आहे. पश्चिम रल्वेच्या दक्षता विभागाने मोठी कारवाई करीत ९३ किलो चंदन कारवाईमध्ये जप्त केले आहे. चंदन तस्करांनी जयपूर-मुंबई सेंट्रल सुपरफास्ट एक्सप्रेस १२९५६ या भाडेतत्वावरील पार्सल व्हॅनमधून चंदन वाहतूक करण्याचा प्रयत्न करण्यात येत होता. मात्र, रेल्वे अधिकाऱ्यांच्या सतर्कतेमुळे तस्करांचा चंदन तस्करीचा प्रयन्न हानून पाडला आहे.

मिळालेल्या माहितीनुसार, बेकायदेशीर कारवायांना आळा घालण्यासाठी पश्चिम रेल्वेच्या दक्षता पथकाने मुंबई सेंट्रल रेल्वे स्थानकावर विशेष प्रतिबंधात्मक तपासणी मोहीम राबवली. या मोहिमेअंतर्गत रेल्वे क्रमांक १२९५६ जयपूर-मुंबई सेंट्रल सुपरफास्ट एक्स्प्रेसच्या पार्सल व्हॅनची कसून तपासणी करण्यात आली. या तपासणी दरम्यान चार संशयास्पद पॅकेजेस पकडण्यात आले, एकूण वजन ९२.९ किलो वजानाचे चंदन आढळून आले.

कायदेशीर पार्सल बुकिंगच्या नावाखाली या मालाची तस्करी करण्याचा प्रयत्न करण्यात आल्याचे समजते. पार्सल बुकिंगच्या माध्यमातून या मौल्यवान लाकडांची अवैध वाहतूक केली जात होती. रेल्वे दक्षता पथकाने यशस्वीपणे हा तस्करांचा डाव उधळून लावला. ही चंदनाची  लाकडे तस्करीसाठी होती, रेल्वे पार्सल सेवेचा गैरवापर करून इच्छित स्थळी पोहोचवण्याचा प्रयत्न केला जात असल्याचे तपासात निष्पन्न झाले आहे.

दक्षता पथकाने जप्त केलेला अवैध मालाबाबत तातडीने वनविभागाला कळविण्यात आला आहे. तपासा दरम्यान एका व्यक्तीलाही ताब्यात घेण्यात आले असून त्याच्याविरुद्ध कायदेशीर कारवाई सुरू करण्यात आली आहे. अवैध लाकूड व संशयित व्यक्तीला पुढील सविस्तर चौकशीसाठी वनविभागाच्या ताब्यात देण्यात आले आहे.

रेल्वे प्रशासनाच्या म्हणण्यानुसार, पार्सल सेवेचा गैरवापर करून तस्करीच्या घटनांमध्ये वाढ झाली आहे, याला आळा घालण्यासाठी सुरक्षा आणि सतर्कतेच्या उपाययोजना आणखी कडक करण्यात येणार आहेत. या प्रकरणी विशेष दक्षता मोहीम राबविण्याचा मुख्य उद्देश बेकायदेशीर कामे आणि पार्सल सेवेचा गैरवापर रोखणे हा आहे.

पश्चिम रेल्वे प्रशासनाने ही कारवाई प्रवासी आणि व्यापाऱ्यांच्या हितासाठी उचललेले महत्त्वाचे पाऊल असल्याचे सांगितले असून भविष्यातही अशा प्रकारची दक्षता तपासणी सुरू ठेवली जाईल, असे सांगितले. प्रवासी आणि व्यावसायिकांना आवाहन करण्यात आले आहे की त्यांनी वैध कागदपत्रांसह पार्सल बुकिंग करावे आणि कोणत्याही संशयास्पद हालचालींची माहिती त्वरित रेल्वे अधिकाऱ्यांना द्यावी. रेल्वे अधिकाऱ्यांच्या सतर्केतेमुळे चंदन तस्करीचा प्रयत्न त्यांनी हाणून पाडला आहे.