रिलीजआधीच ‘दृश्यम 3’चा धुमाकूळ.! अॅडव्हान्स बुकिंगमधून कोटींची कमाई, आकडा ऐकून उडतील होश…
विजय साळगावकर पुन्हा एकदा मोठ्या पडद्यावर परतणार आहे. अजय देवगणचा बहुप्रतीक्षित ‘दृश्यम: द कन्क्लूजन’ रिलीज होण्याआधीच बॉक्स ऑफिसवर आपला दबदबा निर्माण करताना दिसत आहे.
Drishyam 3 : ‘ऑक्टोबर 2 याद है ना?’… ‘दृश्यम’च्या चाहत्यांना ही तारीख चांगलीच लक्षात राहिली आहे. कारण याच दिवशी विजय साळगावकर पुन्हा एकदा मोठ्या पडद्यावर परतणार आहे. अजय देवगणचा बहुप्रतीक्षित ‘दृश्यम: द कन्क्लूजन’ रिलीज होण्याआधीच बॉक्स ऑफिसवर आपला दबदबा निर्माण करताना दिसत आहे.
सिनेमाच्या अॅडव्हान्स बुकिंगला प्रेक्षकांचा जबरदस्त प्रतिसाद मिळत असून, रिलीजपूर्वीच लाखो तिकिटांची विक्री झाली आहे. अवघ्या काही दिवसांच्या बुकिंगमध्ये सिनेमाने 17 कोटी रुपयांहून अधिक ग्रॉस कमाई केली आहे. त्यामुळे आता 2 ऑक्टोबरला ‘दृश्यम 3’ बॉक्स ऑफिसवर नेमका किती मोठा धमाका करणार, याकडे संपूर्ण इंडस्ट्रीचं लक्ष लागलं आहे.
Drishyam 3
रिलीजआधीच कोट्यवधींची कमाई
अजय देवगणच्या ‘दृश्यम’ फ्रँचायझीला गेल्या काही वर्षांत प्रेक्षकांचा मोठा प्रतिसाद मिळाला आहे. त्यामुळे या तिसऱ्या आणि अंतिम भागाबाबत सुरुवातीपासूनच प्रचंड उत्सुकता होती. आता अॅडव्हान्स बुकिंगच्या आकडेवारीतूनही ही उत्सुकता स्पष्टपणे दिसून येत आहे.
ताज्या रिपोर्टनुसार, ‘दृश्यम 3’च्या अॅडव्हान्स बुकिंगमधून आतापर्यंत सुमारे ₹17.35 कोटींची ग्रॉस कमाई झाली आहे. सिनेमाच्या पहिल्या दिवसासाठी तब्बल 2.24 लाख तिकिटांची विक्री झाल्याचं समोर आलं आहे. याशिवाय 7,500 हून अधिक शो बुक झाल्याची माहिती आहे. त्यामुळे प्रदर्शनाच्या दिवसापर्यंत बुकिंगचे आकडे आणखी वाढण्याची शक्यता आहे.
‘दृश्यम 2’लाही टाकणार मागे?
‘दृश्यम 3’च्या अॅडव्हान्स बुकिंगची तुलना आता मागील भागाशी केली जात आहे. 2022 मध्ये प्रदर्शित झालेल्या ‘दृश्यम 2’ने पहिल्या दिवशी भारतात ₹15.38 कोटींची नेट कमाई केली होती. यावेळी अॅडव्हान्स बुकिंगलाच मोठा प्रतिसाद मिळत असल्याने ट्रेडमध्ये सिनेमाच्या ओपनिंगबाबत मोठ्या अपेक्षा निर्माण झाल्या आहेत.
काही ट्रेड अंदाजांनुसार, सध्याचा बुकिंग ट्रेंड कायम राहिल्यास ‘दृश्यम 3’ची पहिल्या दिवसाची कमाई ₹40 कोटींच्या आसपास किंवा त्यापेक्षा जास्त जाऊ शकते. मात्र हा आकडा सध्या केवळ अंदाज असून अंतिम कमाई प्रत्यक्ष रिलीज आणि तिकीट विक्रीनंतरच स्पष्ट होईल.
दमदार स्टारकास्ट !
अभिषेक पाठक दिग्दर्शित या सिनेमात अजय देवगणसोबत तब्बू, श्रिया सरन, इशिता दत्ता, राजत कपूर, प्रकाश राज आणि जयदीप अहलावत महत्त्वाच्या भूमिकांमध्ये दिसणार आहेत. सिनेमाची कथा आणि पुढील ट्विस्टबाबत निर्मात्यांनी मोठी गुप्तता ठेवली आहे.
‘दृश्यम’च्या आधीच्या दोन भागांमध्ये विजय साळगावकरने आपल्या कुटुंबाला वाचवण्यासाठी आखलेल्या चालींनी प्रेक्षकांना अक्षरशः खिळवून ठेवलं होतं. आता अंतिम भागात त्याच्यासमोर कोणतं नवं संकट उभं राहणार आणि यावेळी तो पोलिसांना चकवण्यात यशस्वी होणार का, याची उत्सुकता प्रेक्षकांना लागली आहे.
