बारामती : बारामतीतील डॉ. निलेश महाजन व त्यांच्या पत्नी डॉ. भक्ती महाजन यांना भारत सरकारच्या आयुष मंत्रालयातर्फे दिल्लीमध्ये होणाऱ्या येत्या स्वातंत्र्यदिनाच्या समारंभामध्ये उपस्थित राहण्यासाठी विशेष अतिथी म्हणून निमंत्रण देण्यात आले आहे.

१३ तारखेपासून ते १७ तारखेपर्यंत त्यांना या समारंभामध्ये आमंत्रित केले आहे. १५ ऑगस्टच्या कार्यक्रमानंतर मोरारजी देसाई राष्ट्रीय योग संस्थान, योग प्रमाणीकरण मंडळ, अखिल भारतीय आयुर्वेद संस्थान याठिकाणी जाऊन ते येथील कार्यपद्धतीचा, योगशिक्षणाच्या नवीन संकल्पनांचा अभ्यास करणार आहेत. आयुष मंत्रालयातर्फे दिल्लीमधील विविध पर्यटन स्थळांना भेट देण्याचेही नियोजन असणार आहे. अशा प्रकारचे आमंत्रण मिळणारे वैद्यकीय क्षेत्रातील ते पहिले दाम्पत्य आहे.

बारामती, पुणे शहरामध्ये डॉ महाजन दाम्पत्य हे योग व आयुर्वेद प्रचार व प्रसाराचे कार्य करीत आहेत. उभय दाम्पत्यांनी बारामतीत योग महाविद्यालया स्थापना केली आहे, त्याद्वारे योगशास्त्राचे शास्त्रोक्त प्रशिक्षण देण्यात येते. आयुर्वेद क्षेत्रातही कुशल मनुष्यबळ उपलब्ध होण्यासाठीही आयुर्वेदिक पंचकर्माचे कोर्से सुरु करून रोजगार निर्मितीसाठी हातभार लावला आहे.

त्यांचे अनेक विद्यार्थी विविध सरकारी, खाजगी संस्थांमध्ये योगशिक्षक म्हणून कार्यरत आहेत. विविध मोफत योगशिबिरांच्या माध्यमातून उभय दाम्पत्य सामाजिक भान जपून आरोग्यसेवा देत आहेत. योगशास्त्रात संशोधन व नाविन्यपूर्ण संकल्पनेतुन विविध कार्यक्रमाद्वारे समाज प्रबोधनाचे, तसेच आरोग्या विषयी जनजागृतीचे कार्य सुरु आहे.

आयुष मंत्रालयाच्या योग प्रमाणीकरण मंडळातर्फे त्यांच्या संस्थेला मान्यता मिळाली आहे. बारामतीसारख्या ग्रामीण भागामध्ये अशा प्रकारे मान्यता मिळवणारी त्यांची हि पहिली संस्था आहे. विविध मान्यता प्राप्त पुरस्कारांनी त्यांना गौरविण्यात आले आहे. उभयतांच्या योग क्षेत्रात केलेल्या कार्याची दखल घेऊन आयुष मंत्रालयातर्फे त्यांना स्वातंत्र्य दिनाच्या विशेष कार्यक्रमासाठी विशेष अतिथी म्हणून निमंत्रण देण्यात आले आहे. विविध स्तरातून त्यांचे अभिनंदन आणि कौतुक होत आहे.