पुणे, {प्रभात वृत्तसेवा} – शिक्षण आणि मानवतेच्या दीर्घकाळ समर्पित सेवेसाठी एमआयटी वर्ल्ड पीस युनिव्हर्सिटीचे संस्थापक अध्यक्ष डॉ. विश्वनाथ कराड यांना यूएसए, उटाह येथील ब्रिघम यंग युनिव्हर्सिटीतर्फे (बीवाययू) मानद डी.लिट. पदवी प्रदान करून सन्मानित करण्यात आले.

येथील विद्यापीठाच्‍या दीक्षांत समारंभवेळी बीवाययूचे अध्यक्ष डॉ. सी. शेन रीस, डी. टॉड क्रिस्टोफरसन, रोनाल्ड रासबँड, गेरिट गाँग, रॉन गनेल, रिचर्ड नेल्सन, किंग हुसेन, डॉ. अशोक जोशी आणि बोर्डाचे इतर विश्वस्त सदस्य उपस्थित होते.

सी. शेन रीस यांनी डॉ. विश्वनाथ कराड यांच्या शैक्षणिक क्षेत्रातील उत्तुंग कार्याचे कौतुक केले, तसेच आंतरधर्मीय संवादातून विश्वशांती स्थापनेला देण्याच्या त्यांच्या प्रयत्नांचे कौतुक केले. डाॅ. कराड म्‍हणाले, शिक्षणात वैश्विक मूल्याधिष्ठीत शिक्षणाचा अंतर्भाव करणे गरजेचे आहे. त्यातूनच वसुधैव कुटुम्बकम आणि विश्वशांतीचे वातावरण निर्माण होण्यास मदत होईल.

मन, बुद्धी, आत्मा आणि शरीर हे निसर्ग तत्त्व आहे. आज शरीर आणि बुद्धी यावर सखोल संशोधन होत आहे; परंतु आत्मा आणि मनाच्या शिक्षणाचा विचार झालेला दिसत नाही. जगात शांती नांदायची असेल, तर अध्यात्माबरोबरच मन आणि आत्म्याचा अभ्यास होणे गरजचे आहे.