NEET Exam Controversy – नीट पेपरफुटी प्रकरणी दिल्लीतील कॉकरोच जनता पार्टीच्या मोर्चादरम्यान विद्यार्थ्यांवर झालेल्या पोलीस कारवाईविरोधात दाखल करण्यात आलेल्या याचिकेवर तातडीने सुनावणी घेण्यास सर्वोच्च न्यायालयाने बुधवारी नकार दिला.

या प्रकरणाची सरन्यायाधीश सूर्यकांत यांनी सुनावणी घेतली नाही. सरन्यायाधीशांनी वकील नरेंद्र मिश्रा यांना वेळ नसल्याचे सांगून लाठीचार्जचा व्हिडिओ पाहण्यासही नकार दिला.

सरन्यायाधीश सूर्यकांत यांच्या अध्यक्षतेखालील खंडपीठासमोर अधिवक्ता नरेंद्र मिश्रा यांनी या प्रकरणाचा उल्लेख करत लवकर सुनावणी घेण्याची मागणी केली. यावर सरन्यायाधीश म्हणाले, आमचा आणि तुमचा वेळ वाया घालवू नका.

सुनावणीदरम्यान याचिकाकर्त्या वकिलांनी न्यायालयाला सांगितले की, त्यांच्याकडे असे व्हिडिओ आहेत ज्यामध्ये पोलिसांची दडपशाही दिसून येत आहे. यावर सरन्यायाधीश म्हणाले, आम्हाला व्हिडिओमध्ये रस नाही. आमच्याकडे व्हिडिओ पाहण्यासाठी वेळ नाही.

तसेच याचिकेत आरोप करण्यात आला होता की, दिल्लीमध्ये केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी आयोजित कॉक्रोच जनता पार्टीच्या आंदोलनादरम्यान पोलिसांनी विद्यार्थ्यांवर बळाचा वापर केला. या प्रकरणात न्यायालयाकडून तातडीच्या हस्तक्षेपाची मागणी करण्यात आली होती.