न्यूयॉर्क : अमेरिकेचे अध्यक्ष डोनाल्ड ट्रम्प यांनी आणखी एक टॅरिफ बॉम्ब टाकला आहे. डोनाल्ड ट्रम्प यांनी अमेरिकेबाहेर तयार झालेल्या चित्रपटांवर 100 टक्के टॅरिफ लावण्याचा निर्णय जाहीर केला आहे. गेल्याच आठवड्यात ट्रम्प यांनी अमेरिकेबाहेर बनवल्या जाणाऱ्या औषधांच्या आयातीवर 100 टक्के टॅरिफ लादले आहेत. ट्रम्प यांनी दुसऱ्या टर्ममध्ये अधिक आक्रमक भूमिका घेतली आहे. त्यानुसार त्यांनी भारतावर 50 टक्के टॅरिफ लादले आहे.

आता अमेरिकेबाहेर बनलेल्या चित्रपटांवर 100 टक्के टॅरिफ लावत असल्याचे जाहीर केले. हे टॅरिफ जाहीर करताना ट्रम्प म्हणाले, जसं लहान मुलाच्या हातातील कँडी चोरुन घेतली जाते, तसेच इतर देशांकडून सिनेमा उद्योग अमेरिकेच्या हातातून चोरुन घेण्यात आला आहे. याचा फटका कॅलिफोर्नियाला त्यांच्या कमजोर आणि अक्षम गव्हर्रनरमुळे बसला आहे.

त्यामुळे या आदेशानुसार दीर्घकाळ आणि कधीच न सुटणाऱ्या प्रश्नासाठी अमेरिकेबाहेर बनलेल्या कोणत्याही सर्व चित्रपटांवर 100 टक्के टॅरिफ लावण्याचा निर्णय घेतला आहे. या प्रकरणी लक्ष दिल्याबद्दल धन्यवाद, अमेरिकेला पुन्हा महान बनवुया, असे त्‍यांनी म्‍हटले आहे. दरम्‍यान, डोनाल्ड ट्रम्प यांनी विविध देशांवर टॅरिफ लावले आहेत. यासाठी ते विविध देशांवर दबाव आणून व्यापारी करार करत आहेत. भारत आणि अमेरिका यांच्यात व्यापारी कराराबाबत चर्चा सुरु आहेत.