Donald Trump on Putin । रशियाचे राष्ट्राध्यक्ष व्लादिमीर पुतिन यांच्याबद्दल पूर्वी मवाळ स्वभाव दाखवणारे अमेरिकेचे राष्ट्राध्यक्ष डोनाल्ड ट्रम्प यांनी युक्रेनवरील युद्ध सुरू झाल्यानंतर रशियाने केलेल्या सर्वात मोठ्या हवाई हल्ल्यानंतर आता कठोर भूमिका घेतली आहे. न्यू जर्सीमधील मॉरिसटाउन विमानतळावर माध्यमांशी बोलताना ट्रम्प यांनी रशियन राष्ट्राध्यक्षांवर जोरदार हल्ला चढवला. यावेळी त्यांनी,”मी पुतिनवर खूश नाही. ते पूर्णपणे वेडे झाले आहेत. मला माहित नाही की या माणसाला काय झाले आहे.”असे म्हणत त्यांच्यावर सडकून टीका केली.

माध्यमांशी बोलताना डोनाल्ड ट्रम्प यांनी,”मी पुतिन यांना खूप काळापासून ओळखतो, आमचे चांगले संबंध आहेत. पण आता ते रॉकेट डागत आहे, शहरांवर हल्ले करत आहे, लोकांना मारत आहे. मला हे अजिबात आवडत नाही. मला माहित नाही की या माणसाचे काय झाले आहे. आम्ही एकीकडे बोलत आहोत आणि दुसरीकडे ते कीव आणि इतर शहरांवर क्षेपणास्त्रांचा वर्षाव करत आहे. काहीतरी गडबड आहे. मला हे सर्व अजिबात आवडत नाही.” असे त्यांनी म्हटले.

…तर ते रशियाच्या पतनास कारणीभूत ठरेल Donald Trump on Putin । 

यासोबतच ट्रम्प यांनी सोशल मीडियावर पोस्टही केली. त्यामध्ये त्यांनी,”रशियाचे व्लादिमीर पुतिन यांच्याशी माझे नेहमीच चांगले संबंध राहिले आहेत, पण त्यांच्यासोबत काहीतरी घडले आहे. ते (पुतिन) पूर्णपणे वेडे झाले आहेत. ते विनाकारण अनेक लोकांना मारत आहेत आणि मी फक्त सैनिकांबद्दल बोलत नाहीये. युक्रेनियन शहरांवर विनाकारण क्षेपणास्त्रे आणि ड्रोन डागले जात आहेत. मी नेहमीच म्हटले आहे की त्यांना संपूर्ण युक्रेन हवा आहे, फक्त युक्रेनचा एक तुकडा नाही, आणि कदाचित ते खरे ठरत आहे, परंतु जर त्यांनी तसे केले तर ते रशियाच्या पतनास कारणीभूत ठरेल.”असे म्हटले आहे.

ते पुढे म्हणाले, “तसेच, राष्ट्राध्यक्ष झेलेन्स्की ज्या पद्धतीने बोलत आहेत त्यातून त्यांच्या देशाचे काहीही भले होत नाही. त्यांच्या तोंडातून निघणारी प्रत्येक गोष्ट समस्या निर्माण करते, मला ते आवडत नाही आणि ते थांबवले असते तर बरे झाले असते. हे असे युद्ध आहे जे मी अध्यक्ष असतो तर कधीच सुरू झाले नसते. हे झेलेन्स्की, पुतिन आणि बायडेन यांचे युद्ध आहे, ट्रम्पचे नाही. मी फक्त एक मोठी आणि कुरूप आग विझवण्यास मदत करत आहे जी घोर अक्षमता आणि द्वेषातून सुरू झाली आहे.”

रशियाने युक्रेनवर आतापर्यंतचा सर्वात मोठा हवाई हल्ला केला. रशियाने युक्रेनच्या वेगवेगळ्या भागात ३६७ ड्रोन आणि क्षेपणास्त्रे डागली. युक्रेनियन हवाई दलाच्या म्हणण्यानुसार, त्यांनी ४५ क्षेपणास्त्रे पाडली आणि २६६ ड्रोन नष्ट केले, परंतु असे असूनही अनेक शहरांमध्ये मोठ्या प्रमाणात विनाश झाला. कीवसह ३० हून अधिक शहरे आणि गावांचे नुकसान झाले आहे. या हल्ल्यात किमान १२ जणांचा मृत्यू झाला आणि अनेक जण जखमी झाले.

अमेरिकेचे मौन पुतिन यांना प्रोत्साहन: झेलेन्स्की Donald Trump on Putin । 

युक्रेनचे राष्ट्राध्यक्ष वोलोदिमिर झेलेन्स्की यांनी आंतरराष्ट्रीय समुदायाच्या, विशेषतः अमेरिकेच्या प्रतिसादाबद्दल तीव्र निराशा व्यक्त केली आहे. ते म्हणाले, “शनिवार असो वा रविवार, जग सुट्टीवर जाऊ शकते, पण युद्ध सुरूच आहे. त्याकडे दुर्लक्ष करता येणार नाही. अमेरिकेचे मौन आणि जगाचे मौन पुतिन यांना अधिक अत्याचार करण्यास प्रोत्साहित करत आहे. जोपर्यंत रशियन सरकारवर गंभीर दबाव आणला जात नाही तोपर्यंत असे हल्ले सुरूच राहतील.”

ट्रम्प यांनी शांततेचे प्रयत्न केले, पण पुतिन यांनी त्यांचे वचन मोडले

हे उल्लेखनीय आहे की डोनाल्ड ट्रम्प यांनी अलीकडेच युद्धबंदी आणण्याच्या प्रयत्नात पुतिन यांच्याशी चर्चा केली होती, जी दोन तासांपेक्षा जास्त काळ चालली. याशिवाय, त्यांनी झेलेन्स्कीशी संपर्क साधला आणि दोन्ही पक्षांना वाटाघाटीच्या टेबलावर आणण्याचा प्रयत्न केला. तथापि, तुर्कीये येथे प्रस्तावित शांतता चर्चेला पुतिन उपस्थित न राहिल्याने या प्रयत्नांना धक्का बसला. आंतरराष्ट्रीय समुदायाकडून वारंवार आवाहन करूनही, रशियाने आपले हल्ले तीव्र केले आहेत.