Domestic Dispute – दोन वर्षांपूर्वी लग्न झाले. त्यानंतर पती आपल्यासोबत राहत नाही, अशी तक्रार घेऊन एक महिला चिंचवड पोलीस ठाण्यात आली. पोलीस ठाण्यात आल्यानंतर तिने आपण फिनाईल पिले असल्याचे पोलिसांना सांगितले. मात्र तिला कोणताही त्रास होत नसल्याने तसेच हे प्रकरण वाकड मधील असल्याने पोलिसांनी महिलेला वाकड पोलीस ठाण्यात पाठवून दिले. मंगळवारी (दि. १४) एक ३२ वर्षीय महिला चिंचवड पोलीस ठाण्यात आली. तिने पोलिसांकडे तक्रार केली की, तिचा पती तिच्यासोबत राहत नाही. प्रकरणाची दखल घेत पोलिसांनी तिच्याकडे चौकशी केली. त्यात तिने सांगितले की, तिचा २२ वर्षीय तरुणासोबत दोन वर्षांपूर्वी विवाह झाला आहे. हे दोघे डांगे चौक, थेरगाव येथे राहत होते. विवाहानंतर तो काही दिवस सोबत होता. मात्र त्यानंतर तो सोबत राहत नाही. तो आता चिंचवड गावात राहण्यास असल्याने चिंचवड पोलीस ठाण्यात गुन्हा दाखल करावा अशी महिलेने मागणी केली. पती सोबत राहत नाही म्हणून गुन्हा दाखल करता येणार नसल्याचे पोलिसांनी सांगितले. त्यावर महिलेने आरोप केला की तिच्या पतीने तिच्यावर अत्याचार केले आहेत. तसेच ती फिनाईल पिऊन पोलीस ठाण्यात आली असल्याचेही तिने सांगितले. तिची प्रकृती स्थिर असल्याने अत्याचाराबाबत तक्रार दाखल करण्यासाठी चिंचवड पोलिसांनी तिला वाकड पोलीस ठाण्यात पाठवून दिले.वाकडचे वरिष्ठ पोलीस निरीक्षक अशोक कडलग म्हणाले की, मंगळवारी अशी कोणतीही महिला वाकड पोलीस ठाण्यात आली नाही. महिला आल्यानंतर तिची तक्रार ऐकून घेतली जाईल. त्यानंतर त्याबाबत योग्य ती कार्यवाही केली जाईल.
