नवी दिल्ली  – भारतीय रुपयाचे मूल्य मंगळवारी पुन्हा 55 पैशांनी घसरून रुपयाचा भाव 87 रुपये 17 पैसे प्रति डॉलर या ऐतिहासिक निचांंकी पातळीवर गेला. मात्र रुपयाचे सध्याचे घसरत असलेले मूल्य हा अर्थ मंत्रालयाच्या दृष्टिकोनातून फारसा चिंतेचा विषय नाही. रुपयाचे मूल्य स्थिर ठेवण्यासाठी रिझर्व बँक आवश्यक ते प्रयत्न करत आहे, असे वित्तसचिव सचिव तुहीन कांत पांडे यांनी सांगितले.

भारतीय रुपयाचे मूल्य सध्या जागतिक चलनाच्या तुलनेत योग्य पातळीवर कमी जास्त होत आहे. त्यामुळे जास्त चिंता करण्याची गरज नाही. सध्या परदेशी गुंतवणूक परत जात असल्यामुळे रुपयाच्या मूल्यावर काही प्रमाणात परिणाम झाला आहे. मात्र त्याचे व्यवस्थापन केले जात आहे.

अगोदरच रुपयाचे मूल्य कमी पातळीवर असताना अमेरिकेचे अध्यक्ष डोनाल्ड ट्रम्प यांनी कॅनडा आणि मेक्सिकोवर 25% आयात शुल्क लावले आहे. त्याचबरोबर चीनवर दहा टक्के आयात शुल्क लावले आहे. यामुळे जागतिक व्यापार युद्ध सुरू झाले असून चीन हा अमेरिकेच्या निर्णयाविरोधात जागतिक व्यापार संघटनेत गेला आहे. तर कॅनडा आणि मेक्सिको अमेरिकेच्या वस्तूवर आयात शुल्क लावणार आहेत. अशा परिस्थितीत चलन बाजारात कमालीची अस्थिरता निर्माण झाली असून त्याचा बराच परिणाम मंगळवारी रुपयाच्या मूल्यावर झाला.

परदेशी संस्थागत गुंतवणूकदार शेअर बाजारातून विक्री करीत आहेत. शनिवारी या गुंतवणूकदारानी 1,327 कोटी रुपयांच्या शेअरची विक्री केली. दरम्यान गेल्या आठवड्यात भारताकडील परकीय चलन साठ्यात 5.5 अब्ज डॉलरची वाढ होऊन भारताकडील परकीय चलन साठा 629.5 अब्ज डॉलरवर गेला आहे. हा परकीय चलन साठा भारताला दहा महिने पुरेल एवढा आहे. त्यामुळे या आघाडीवर फारसी चिंता करण्याची गरज नाही. लवकरच जागतिक परिस्थिती सुरळीत होण्याची शक्यता अर्थ मंत्रालयाच्या काही अधिकार्‍यांनी व्यक्त केली.