Divya Dutta: अभिनेत्री दिव्या दत्ता ह्या हिंदी सिनेमातल्या अशा काही निवडक अभिनेत्रींपैकी एक आहेत ज्या प्रत्येक भूमिकेत प्रामाणिकपणे आणि खोलवर शिरून अभिनय करतात. ‘दिल्ली-6’, ‘वीर-झारा’ आणि ‘भाग मिल्खा भाग’ यांसारख्या अनेक चित्रपटांत त्यांच्या अभिनयाची प्रशंसा झाली आहे. ३१ वर्षांचा सिने प्रवास आणि आता तेलुगु पदार्पण: गेली ३१ वर्षं हिंदी सिनेसृष्टीत कार्यरत असलेल्या दिव्या दत्ताने पंजाबी, उर्दू, तमिळ, मल्याळम आणि इंग्रजी भाषांतील चित्रपटांतही काम केलं आहे. आता त्या ‘माया सभा’ या तेलुगु चित्रपटातून त्या तिथल्या इंडस्ट्रीत पहिलं पाऊल टाकत आहेत. एका चॅनेलला मुलाखत देताना त्यांनी आपल्या भूमिकेबाबत, सिने उद्योगातील अनुभवांविषयी आणि आपल्या प्रवासावर सविस्तरपणे भाष्य केलं. ‘माया सभा’चीच निवड का? “मला वाटतं सुरुवात करण्यासाठी असं प्रोजेक्ट असावं, ज्यात वजन असावं. ‘माया सभा’ हा एक पॉलिटिकल ड्रामा आहे, पीरियड सेटअपमध्ये तयार झालेली काल्पनिक कथा. प्रत्येक पात्राला महत्त्व आहे, आणि माझी भूमिकाही अतिशय खास आहे. अशी जी शांतपणे खेळ उलथवू शकते,” असं त्या म्हणाल्या. ‘हीरोइन टाइप लुक’चा दवाब कधी जाणवला का? “नाही, मला कधीच तसा दवाब वाटला नाही. सुरुवातीला मी हिरोंसोबत गाणी केली, रोमॅन्सही केला. पण नंतर ‘ट्रेन टू पाकिस्तान’ सारख्या चित्रपटांत काम मिळालं आणि श्याम बेनेगल यांसारख्या दिग्दर्शकांबरोबर काम केलं. मी जाणूनबुजून वेगळा मार्ग निवडला आणि तो मला अधिक समाधानकारक वाटला,” असं त्यांनी सांगितलं. जर एखाद्याची बायोपिक करायची असेल तर…? “मला अमृता प्रीतम यांची बायोपिक करायला आवडेल. त्यांची लेखणी, भावना आणि बेधडक वृत्तीने मला नेहमीच खोलवर प्रभावित केलं आहे. त्या केवळ कवयित्री नव्हत्या, त्या एक विचार होत्या, एक क्रांती होत्या. त्यांची भूमिका साकारणं हे माझ्यासाठी सन्मानाची बाब असेल,” असं भावूक होत त्या म्हणाल्या. दिव्या दत्ता यांचा वर्कफ्रंट: सशक्त अभिनयासाठी ओळखल्या जाणाऱ्या दिव्या दत्ताने चित्रपट, वेब सिरीज आणि ओटीटी प्लॅटफॉर्मवर स्वतःचं वेगळं स्थान निर्माण केलं आहे. त्या शेवटच्या वेळेस १४ फेब्रुवारी २०२५ रोजी प्रदर्शित झालेल्या ऐतिहासिक चित्रपट ‘छावा’ मध्ये राजमाता सोयराबाई भोसले यांच्या भूमिकेत झळकल्या होत्या.
